ԱՄՆ Սենատի հանձնաժողովի նախագահը Բաքվին կոչ է արել ազատ արձակել ադրբեջանցի հայտնի ընդդիմադիր տնտեսագետին

ԱՄՆ Սենատի արտաքին հարաբերությունների հանձնաժողովի նախագահ, սենատոր Բեն Քարդինը  հերթական անգամ Ադրբեջանի իշխանություններին կոչ է արել ազատ արձակել  հայտնի տնտեսագետ ու ընդդիմադիր քաղաքական գործիչ Գուբադ Իբադօղլուին։

«Դոկտոր Գուբադ Իբադօղլուն՝ միջազգայնորեն հարգված գիտնական և քաղաքական ակտիվիստ, այսօր տնային կալանքի տակ է անցկացնում իր ծննդյան 53-րդ տարեդարձը՝ Ադրբեջանում կոռուպցիայի բացահայտման համար 274 օր կալանքից հետո: Ես ևս մեկ անգամ կոչ եմ անում իշխանություններին  ազատ արձակել Գուբադ Իբադօղլուին»,- գրել է Քարդինը X-ի իր էջում։

Քարդինը օրերս հայտարարություն էր տարածել 2024 թվականի նոյեմբերի 11-ից նոյեմբերի 22-ը ՄԱԿ-ի Կլիմայի փոփոխության հարցերով համաժողովը (COP29) Բաքվում  անցկացնելու առիթով և կոչ էր արել Ադրբեջանի նախագահ Իլհամ Ալիևին ազատ արձակել հայ գերիներին, ինչպես նաև կառավարության կողմից անարդարացի ձերբակալված ադրբեջանցիներին։

Նշենք, որ այս տարվա ապրիլի 22-ին Ադրբեջանի իշխանությունները, տեղի տալով միջազգային ճնշումներին, Իբադօղլուի բանտարկությունը փոխարինել էին տնային կալանքով։ Գուբադ Իբադօղլուն կալանավորվել է 2023 թվականի հուլիսի 23-ին՝ կեղծ փողեր պատրաստելու (Քրեական օրենսգրքի 204.3.1 հոդված) և կրոնական ծայրահեղական բնույթի նյութեր տարածելու մեղադրանքով (քրեական օրենսգրքի 167-3.1 հոդված)։ Այս մեղադրանքներով նրան սպառնում է մինչև 17 տարվա ազատազրկում։ 2023 թվականի հուլիսի 24-ին Բաքվի Նարիմանովի շրջանային դատարանն ընդդիմադիր գործչի նկատմամբ խափանման միջոց է ընտրել 3 ամիս 26 օր ժամկետով կալանքը։ Փետրվարի 15-ին նրա կալանքը երկարացվել է ևս երեք ամսով։

Իբադօղլուն չի ընդունում առաջադրված մեղադրանքները՝ նշելով, որ իրեն բանտարկել են քաղաքական պատվերով։ Տեղական և միջազգային իրավապաշտպան կազմակերպությունները Իբադօղլուին համարում են քաղբանտարկյալ։

Էմմա Չոբանյան