Ավինյանն առաջարկում է 20-ով ավելացնել Հասարակական կարգի պահպանության ծառայության հաստիքացուցակը․ բյուջեն կավելանա շուրջ 6 միլիոն դրամով

Երևանի քաղաքապետ Տիգրան Ավինյանն առաջարկում է փոփոխություններ անել Երևան քաղաքի ավագանու 2023 թվականի դեկտեմբերի 26-ի N41-Ա որոշման մեջ։

Ըստ այդմ՝ Ավինյանն առաջարկում է ավելացնել Հասարակական կարգի պահպանության ծառայության հաստիքացուցակը՝ ստեղծելով տարածքային չորրորդ բաժին։ Այս մասին Factor.am-ը տեղեկանում է քաղաքապետարանի կայքէջից։

Ըստ քաղաքապետի հեղինակած նախագծի՝ բաժնի պետը կստանա 408,000 ՀՀ դրամ, գլխավոր մասնագետը (թվով 4)՝ 306,000 ՀՀ դրամ, առաջատար մասնագետը (թվով 6)՝ 292,400 ՀՀ դրամ, իսկ առաջին կարգի մասնագետը (թվով 6)` 278,800 ՀՀ դրամ աշխատավարձ։

Բացի այս, Ավինյանն առաջարկում է տարածքային առաջին, երկրորդ և երրորդ բաժինների գլխավոր մասնագետների հաստիքների քանակը 3-ից դարձնել 4 (աշխատավարձը՝ 306,000)։ Ստացվում է՝ Հասարակական կարգի պահպանության ծառայության հաստիքացուցակն ավելացվում է 20-ով։

Factor TV-ի ուսումնասիրության համաձայն՝ 16,010,600 դրամի փոխարեն բյուջեն կկազմի 21,987,800, այսինքն՝ շուրջ 6 միլիոն դրամով ավելի։ Ավագանու հերթական նիստի օրակարգում ընդգծրկված այս նախագծի հիմնավորման մեջ Տիգրան Ավինյանը նշել է․ «Ծառայությունն իր իրավասության սահմաններում ամենօրյա հսկողական և վերահսկողական գործառույթներ է իրականացնում, այդ թվում՝ հերթապահություններ, ինչպես նաև գիշերային այցելություններ Երևան քաղաքի վարչական տարածքում առևտրի և ծառայությունների, քաղաքաշինության, կոմունալ տնտեսության, տրանսպորտի և այլ ոլորտներում օրենսդրությամբ, այդ թվում՝ Երևան քաղաքի ավագանու որոշումներով սահմանված պահանջների կատարումն ապահովելու նպատակով։ 2024 թվականի ընթացքում Երևան քաղաքում հայտնաբերվել և կազմվել են մոտ 1600 վարչական իրավախախտման փաստերի վերաբերյալ արձանագրություններ, զանցանք թույլ տված անձանց վարչական պատասխանատվության ենթարկելու նպատակով։

Հաշվի առնելով Օրենսգրքի 255-րդ հոդվածով սահմանված պահանջը բազմաթիվ վարչական իրավախախտման փաստերի վերաբերյալ արձանագրություններ կազմվել են ընթացիկ վարչարարությամբ, մասնավորապես` առանձին ծանուցագրեր ուղարկելով զանցանք թույլ տված ֆիզիկական կամ իրավաբանական անձանց: Նշված փաստաթղթաշրջանառության կազմակերպումը պահանջում է լրացուցիչ մարդկային ռեսուրսների ներգրավում` հաշվի առնելով, արձանագրության կազմման գործընթացի առանձնահատկությունը, ծանուցագրերի նախապատրաստումը և ծրարավորումը, մուտքագրումը համապատասխան փաստաթղթաշրջանառության ծրագիր (Mullberry) և համապատասխան ելքագրումը նշված փաստաթղթերի փոստային ծառայության, իսկ առանձին դեպքերում նաև այլ գերատեսչությունների միջոցով»։

Ի դեպ, նախագիծը չզեկուցվող է, ինչը նշանակում է, որ ավագանու՝ սեպտեմբերի 10-ի հերթական նիստում հարցը չի քննարկվի, այլ միանգամից կդրվի քվեարկության։

Արփի Հակոբյան