07.11.2026 | 09:42
Հայաստանը, ԱՄՆ-ն ու Ադրբեջանը գործարկել են ԹՐԻՓՓ-ի եռակողմ տեխնիկական պլանավորման խմբերը
Պակիստանի հետ շարունակական երկխոսության դարաշրջանն ավարտվել է․ Հնդկաստանի ԱԳՆ ղեկավար
Քաղաքականություն
30.08.2024 | 22:33
Հնդկաստանի և Պակիստանի միջև հաղորդակցությունը կշարունակվի, բայց երկու երկրների միջև «շարունակական երկխոսության դարաշրջանն» ավարտվել է։ Այս մասին հայտարարել է Հնդկաստանի արտգործնախարար Սուբրամանիամ Ջայշանքարը Նյու Դելիում մասնավոր միջոցառման ժամանակ, հաղորդում է հնդկական NDTV հեռուստաալիքը։
«Թույլ տվեք ասել սա. ես կարծում եմ, որ Պակիստանի հետ շարունակական երկխոսության դարաշրջանն ավարտվել է: Գործողությունները միշտ ունեն հետևանքներ», – ասել է Ջայշանքարը՝ հավելելով, որ խոսքը Պակիստանի գործողությունների մասին է՝ կապված Ջամուի և Քաշմիրի իրավիճակի հետ։
Նախարարին հարցրել են երկկողմ հարաբերությունների վերաբերյալ այդ տարածաշրջանում ընդդեմ Հնդկաստանի, ենթադրաբար, Պակիստանի կողմից աջակցվող ահաբեկչական գործողությունների վերաբերյալ։
Հարցին էլ՝ արդյո՞ք Հնդկաստանը կհամաձայնի ապագայում շարունակել երկկողմ հարաբերություններն այն տեսքով, որը եղել է մինչ այժմ, Ջայշանքարի պատասխանն անորոշ է եղել։
«Գուցե այո, գուցե՝ ոչ։ Բայց ես ուզում եմ ասել, որ մենք պասիվ չենք, և անկախ նրանից՝ իրադարձությունները դրակա՞ն, թե՞ բացասական ուղղություն կունենան, ամեն դեպքում, մենք կարձագանքենք»,- ասել է նա։
Հեռուստաալիքի հրապարակած տեսանյութի մեկնաբանության մեջ նշվում է, որ Ջայշանքարի հայտարարությունը մոտ ապագայում կարող է շրջադարձային դառնալ երկու երկրների հարաբերություններում։
