05.08.2026 | 19:00
Ծովագյուղում ապօրինի պահվող գայլերը տեղափոխվել են Երևանի կենդանաբանական այգի․ քաղաքացին տուգանվել է
Նախատեսվում է ներդնել անապահովության գնահատման նոր համակարգ
Հասարակություն
29.08.2024 | 22:43
Փաթեթով սահմանվում են այն իրավական հիմքերը, որոնցով անապահովության գնահատման նոր համակարգի միջոցով նոր անապահովության նպաստ կտրամադրվի քաղաքացիներին՝ գործող ընտանեկան եւ սոցիալական նպաստի փոխարեն: ԱԺ մամուլի ծառայությունից տեղեկացնում են, որ ԱԺ աշխատանքի եւ սոցիալական հարցերի մշտական հանձնաժողովի՝ օգոստոսի 29-ի արտահերթ նիստում ասել է ՀՀ աշխատանքի եւ սոցիալական հարցերի նախարարի տեղակալ Աննա Ժամակոչյանը՝ ներկայացնելով ««Պետական նպաստների մասին» օրենքում փոփոխություններ եւ լրացումներ կատարելու մասին» եւ կից մի շարք օրենքներում փոփոխություններ եւ լրացումներ նախատեսող օրենսդրական փաթեթը:
Ներդրվելու է անապահովության գնահատման նոր համակարգ, որի նպատակն այն է, որ համակարգը լինի ավելի հասցեական, թիրախային եւ արդյունավետ: Նախատեսվում է սոցիալական աջակցության ծրագրերի իրականացման արդյունքում ավելի շատ զարգացնել ծառայությունների դաշտը, քան պարզապես դրամական միջոցների նպաստներով սահմանափակել սոցիալական աջակցությունը:
Համակարգը հիմնված է լինելու կարիքի իրական գնահատման եւ համաչափ սոցիալական ծառայություններ տրամադրելու սկզբունքի վրա, որը խրախուսելու է անձի սոցիալ-տնտեսական ակտիվությունը:
Ըստ փաթեթի՝ անապահովության նպաստ ստանալու իրավունք կունենա ՀՀ կառավարության որոշմամբ հաստատված ընտանիքի անապահովության գնահատման կարգով սոցիալապես անապահով ճանաչված այն ընտանիքը, որի մեկ հաշվարկային անդամի ամսական եկամտի չափը ցածր է ՀՀ կառավարության կողմից տվյալ տարվա համար սահմանված անապահովության նպաստ ստանալու իրավունք տվող սահմանային շեմից:
Ելնելով ծայրահեղ աղքատության վերացման նպատակադրումից՝ այդ շեմը սահմանվելու է այնպես, որ անապահովության նպաստի նոր համակարգում ընդգրկվեն այն ընտանիքները, որոնց մեկ հաշվարկային անդամի ամսական եկամուտի չափը ցածր է պարենային զամբյուղի արժեքի նկատմամբ հաշվարկվող տոկոսի արժեքից:
Հանձնաժողովի նախագահ Հերիքնազ Տիգրանյանը ներկայացրել է առաջարկներ, որոնք հեղինակի կողմից ընդունելի են եղել: Դրանք վերաբերել են կեղծ փաստաթուղթ ներկայացնելու դեպքում նպաստի նշանակումը դադարեցնելուն եւ երեխայի՝ պարտադիր կրթությունից դուրս չմնալու նպատակով տարիքը նշելու դրույթին: Հանձնաժողովի նախագահն առաջարկել է չնշել երեխայի տարիքը, քանի որ նա կարող է մեծ լինել 18 տարեկանից:
Օրենսդրական փաթեթն արժանացել է հանձնաժողովի դրական եզրակացությանը: Այն կընդգրկվի ԱԺ ութերորդ գումարման ութերորդ նստաշրջանի օրակարգի նախագծում:
