ԲՏԱ փոխնախարարն ու դեսպան Իմանբաևն անդրադարձել են «ՀայՓոստի» և «ԿազՓոստի» միջև ձևավորված համագործակցությանը

ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանն օգոստոսի 28-ին ընդունել է Հայաստանի Հանրապետությունում Ղազախստանի Հանրապետության արտակարգ և լիազոր դեսպան Բոլատ Իմանբաևին։

ԲՏԱ նախարարությունից տեղեկացնում են, որ կողմերն ընդգծել են, որ տեխնոլոգիական ոլորտում երկու երկրների միջև համագործակցության լավ փորձ է ձևավորվել, որը զարգանալու և ընդլայնվելու մեծ հեռանկարներ ունի:

Հանդիպման ընթացքում անդրադարձ է կատարվել հայ-ղազախական տնտեսական համագործակցության միջկառավարական հանձնաժողովի 10-րդ նիստի արձանագրությանը, «ՀայՓոստի» և «ԿազՓոստի» միջև ձևավորված համագործակցությանը, Հայաստանում հոկտեմբերին կայանալիք Նորարարության և տեխնոլոգիաների համաշխարհային կոնգրեսին (WCIT) ղազախական կողմի մասնակցությանը։

Կարևորվել է սեպտեմբերի 3-5-ը Աստանայում կայանալիք ՄԱԿ-ի Ասիայի և Խաղաղ օվկիանոսի տնտեսական և սոցիալական հանձնաժողովի (ESCAP) «Թվային ներառականության» խորագրի ներքո կայանալիք գագաթնաժողովին Գևորգ Մանթաշյանի ղեկավարած պատվիրակության մասնակցությունը։

Քննարկվել են տեխնոլոգիական ոլորտում հայ-ղազախական հարաբերությունների հետագա զարգացման, համագործակցության ընդլայնման հնարավորությունները թվայնացման, արհեստական բանականության, կիբեռանվտանգության, հեռահաղորդակցության ոլորտներում:

Ներկայացվել են երկու երկրներում առաջիկայում կայանալիք ոլորտային միջոցառումները, ընդգծվել է փորձի փոխանակման, մասնագետների փոխադարձ այցերի կարևորությունը, ինչը կնպաստի գործակցության էլ ավելի ամրապնդմանն ու երկկողմ կապերի ընդլայնմանը։