07.10.2026 | 23:48
Արթուր Դանիելյանը կալանավորվեց
Առեղծվածային հեղաշրջման փորձ Մալդիվներում
Քաղաքականություն
28.08.2024 | 21:46
Մալդիվների նախագահ Մուհամեդ Մույցզուն տեղի բանկիրներին մեղադրել է հեղաշրջման փորձի մեջ: Ոստիկանությունը սկսել է հետաքննել երկրում անկարգությունների պատճառները, գրում է The Edition-ը։
Հետաքննություն է սկսվել այն կասկածների վերաբերյալ, որ ժողովրդական ընդդիմությունը, օգտվելով պետության ֆինանսական խնդիրներից, որոշել է պաշտոնանկ անել նախագահ Մոհամեդ Մույզուին։ Maldives Republic-ի հաղորդմամբ՝ իրավապահների հայտարարության մեջ անդրադարձ կա «հեղաշրջման փորձի հետաքննությանը»։
Սոցցանցերում հանրահավաքների և կառավարության տապալման կոչեր են սկսել տարածվել այն բանից հետո, երբ Մալդիվների բանկի խորհուրդը, ի հեճուկս կառավարության հրամանների, դադարեցրել է դեբետային քարտերով գործարքները և քաղաքացիներին թույլատրել է վարկային քարտից ամսական առավելագույնը 100 դոլար ծախսել առցանց գործարքների համար:
Ոստիկանության պնդմամբ՝ հարյուրավոր բոտեր են հայտնվել սոցցանցերում՝ կոչ անելով քաղաքացիներին դուրս գալ փողոց և տապալել կառավարությունը։ Իշխանությունները դրա համար մեղադրում են ընդդիմադիր Մալդիվյան դեմոկրատական կուսակցությանը։ Իշխանության որոշ ներկայացուցիչներ էլ բանկի գործողությունները համարում են ընդդիմության ինտրիգներ։
Նախագահի ճնշման ներքո և ֆինանսական կարգավորիչի միջամտությունից հետո բանկը հանել է սահմանափակումները։
Միևնույն ժամանակ, Maldives Republic-ի հետ զրույցում վերլուծաբանները մատնանշել են իրադարձություններին կառավարության արձագանքի որոշակի անհամապատասխանություն՝ հավելելով, որ իշխանությունները բավական ժամանակ ունեին բանկի որոշումը չեղարկելու համար նույնիսկ նախքան դրա հրապարակումը: Նույն վերլուծաբանները նշում են, որ բանկի տնօրենների խորհրդի անդամների մեծամասնությունը նշանակվել է գործող իշխանությունների կողմից, և անհավատարմության մեղադրանքները տարօրինակ են հնչում։
Ընդդիմությունը կտրականապես հերքում է ցանկացած ապօրինություն և, իր հերթին, իշխանությունների մեղադրանքներն անվանում է Մալդիվների տնտեսական խնդիրներից ուշադրությունը շեղելու փորձ։ Այդ ընթացքում ոստիկանության հետաքննությունը շարունակվում է։
