Ուկրաինայի ԶՈւ-ն սպառնում է Կուրսկի մարզի ևս մեկ շրջանի

ՌԴ Կուրսկի շրջան Ուկրաինայի զինված ուժերի ներխուժումից երկու շաբաթ անց ռուսական բանակը դեռևս չի կարողացել ամբողջությամբ կասեցնել առաջխաղացումը։ Ուկրաինական զորքերը ոչ միայն ընդլայնում են օկուպացված տարածքը, այլև, ինչն ամենակարևորն է, հավանաբար, նախապատրաստում են մարտական գործողությունների նոր տարածք՝ կտրելով ռուսական մատակարարման գծերը Կուրսկի Գլուշկովսկի շրջանում, գրում է BBC-ի ռուսական ծառայությունը։

Կուրսկի մարզում Ուկրաինայի զինված ուժերի գրաված տարածքի թերություններից մեկն այն է, որ այն, ըստ էության, սեպ է՝ երեք կողմից շրջապատված Ռուսաստանի կողմից վերահսկվող գոտիով։ Դա ուկրաինացիների համար պոտենցիալ անբարենպաստ դիրք է, քանի որ այս սեպը երեք կողմից հրետանու կրակի տակ է:

Երկու շաբաթ տևած մարտերում ուկրաինական զինուժը ոչ թե խորացրել է բեկումը, այլ ընդլայնել այն՝ հարձակվելով եզրերում։

Միևնույն ժամանակ, Կուրսկի շրջան ուկրաինական ներխուժման մեկնարկից հետո առաջին օրերին բնորոշ արագ առաջխաղացումը տեղի տվեց հարձակման, որի տեմպերը նկատելիորեն ավելի դանդաղ են։

Ըստ հրապարակման՝ Ուկրաինայի զինված ուժերի կողմից ներկայում զբաղեցրած տարածքը բավականին դժվար է որոշել․ մարտական գոտուց տեղեկատվությունը կա՛մ ուշ է գալիս, կա՛մ դժվար է ճշտել: Երկրորդ՝ գյուղում փոքր ջոկատի առկայությունը միշտ չէ, որ նշանակում է հսկողություն դրա նկատմամբ. ուկրաինական հետախուզական ջոկատները կարող են շատ հեռու գնալ Ռուսաստանի տարածքում, բայց դա չի նշանակում, որ դրա նկատմամբ վերահսկողություն է հաստատվել։

Ուկրաինայի զինված ուժերի զգալի ուժերի առկայության մասին կարելի է դատել Ռուսաստանի Պաշտպանության նախարարության հայտարարություններից, որը հաղորդում է մարտերի և հրետակոծությունների մասին։

Երկուշաբթի առավոտյան իր զեկույցում ՌԴ ՊՆ-ն նշել է Կուրսկի շրջանի այն բնակավայրերը, որոնց տարածքում ռուսական բանակը հարվածներ է հասցրել՝ Բորկի, Բոգդանովկա, Վիշնևկա, Վիկտորովկա, Կոսիցա, Լյուբիմովկա, Մելովոյ, Սնագոստ։ Այս բնակավայրերի տարածքում մարտեր են ընթանում, և ստույգ տեղեկություն չկա, թե ով է վերահսկում դրանք։

Այն փաստը, որ դրանք նշված են ՌԴ Պաշտպանության նախարարության ամփոփագրում, հաստատում է ուկրաինական աղբյուրների տեղեկատվությունը։ Ուկրաինան այժմ վերահսկում է Բորկիից մինչև Կորենևոյի արվարձանների տարածքը։