ԱՄՆ-ի դիրքորոշումը Վրաստանի հանդեպ «երկկուսակցական» է, իշխանափոխությունից հետո ոչինչ չի փոխվի․ հայտարարություն Թբիլիսի այցից հետո

Վրաստանում ժողովրդավարության հետընթացի վերաբերյալ ԱՄՆ-ի մտահոգությունները երկկուսակցական են և երկպալատ: Եթե անգամ ԱՄՆ վարչակազմում փոփոխություններ լինեն, գնահատականը չի փոխվի։ Նման հայտարարությամբ է հանդես եկել հանրապետական կոնգրեսական Մայք Թերները։ Նրա խոսքերը ներկայացված են Թերների և դեմոկրատ սենատոր Ժաննա Շահինի՝ Վրաստան կատարած համատեղ այցից հետո տարածված համատեղ հաղորդագրության մեջ։

Դրանում նշվում է, որ ամերիկացի օրենսդիրների երկկուսակցական այցը Վրաստան տեղի է ունեցել «ԱՄՆ-ի գործողությունների ֆոնին, որոնք դադարեցրել են երկկողմ օգնությունը Թբիլիսիին՝ վրացական իշխանությունների վերջին գործողությունների պատճառով»։

«ԱՄՆ-Վրաստան հարաբերությունները պատմականորեն եղել են ամենաուժեղներից մեկը տարածաշրջանում, սակայն ժողովրդավարական արժեքների դեմ վերջին զարգացումները զգալի անհանգստություն են առաջացրել ԱՄՆ-ում և Եվրամիությունում»,- ասել է Թերները:

Սենատոր Շահինն ընդգծել է, որ վրաց-ամերիկյան երկկողմ հարաբերությունները նորմալ վիճակի վերադարձնելու առաջին քայլը պետք է անի Վրաստանի կառավարությունը։

«Մենք չենք կարող ձեռքերը ծալած կանգնել ժողովրդավարական հետընթացի և Միացյալ Նահանգների դեմ ուղղված կեղծ պնդումների առաջ: Մեզ անհրաժեշտ են ազատ և արդար ընտրություններ ու բարեխիղճ ջանքեր՝ չեղարկելու «օտարերկրյա գործակալների» մասին օրենքը, որն ավելի շատ վնաս է հասցնում ազգին, քան օգուտ՝ ԵՄ ինտեգրման ճանապարհին»,- ասել է Շահինը:

ԱՄՆ երկու հիմնական կուսակցությունների ներկայացուցիչների այցը Թբիլիսի տեղի է ունեցել վրաց-ամերիկյան հարաբերություններում աննախադեպ ճգնաժամի ֆոնին։ Վաշինգտոնը վերջերս հայտարարեց հարաբերությունների վերանայման, ֆինանսական օգնության դադարեցման և զորավարժությունների չեղարկման մասին՝ վրացական իշխանությունների՝ «ժողովրդավարությունից նահանջելու» և արևմտյան գործընկերների դեմ կեղծ մեղադրանքների պատճառով։