Մարսի վրա ջուր է հայտնաբերվել

ՆԱՍԱ-ի գիտնականներն առաջին անգամ Մարսի վրա հեղուկ ջուր են հայտնաբերել։ Այն հայտնաբերվել է մոլորակի մակերևույթի տակ գտնվող մեծ խորություններում, փոխանցում է BBC-ի ռուսական ծառայությունը։

Գիտնականները եկել են եզրակացության, որ Մարսի ընդերքի խորքում հեղուկ ջրի «պղպջակ» կա՝ ՆԱՍԱ-ի Mars Insight Lander զոնդի հավաքած տվյալների վերլուծությունից հետո: Վերլուծության արդյունքները հրապարակվել են Proceedings of the National Academy of Sciences ամսագրում։

Հարևան մոլորակի վրա արդեն հայտնաբերվել է ջուր, բայց ոչ հեղուկ վիճակում, այլ բևեռներում սառույցի և մթնոլորտում գոլորշու մնացորդների տեսքով։ Mars Insight Lander զոնդը վայրէջք է կատարել հարևան մոլորակի մակերեսին 2018 թվականին և մինչև 2022-ի վերջը հանգիստ նստել է մեկ տեղում և «լսել մոլորակին»՝ օգտագործելով սեյսմոգրաֆը՝ գրանցելով Մարսի ընդերքի ցնցումները: Գիտնականները, չափելով սեյսմիկ ալիքների արագությունը, մեծ հավանականությամբ կարող են որոշել, թե ինչ միջավայրով են դրանք անցնում։

«Սա իրականում նույն մեթոդն է, որն օգտագործվում է Երկրի վրա ջրի, նավթի կամ գազի ստորգետնյա հանքավայրեր գտնելու համար», – BBC-ին բացատրել է Կալիֆորնիայի համալսարանի պրոֆեսոր Մայքլ Մանգան, ով ներգրավված է եղել նախագծում:

Վերլուծությունը ցույց է տվել, որ ջուրը գտնվում է Մարսի մակերեսի տակ՝ 10-ից 20 կիլոմետր խորության վրա։

Այս հայտնագործությունը, ըստ պրոֆեսոր Մանգայի, մասամբ պատասխանում է մեծ հարցին՝ «Ո՞ւր է անհետացել Մարսից ջուրը»:

Գիտնականները, ովքեր ուսումնասիրել են Մարսի մակերեսը, վաղուց եկել են այն եզրակացության, որ ժամանակին դրա վրա ջուր է եղել՝ մակերեսին գետերի և լճերի հետքեր կան։ Սակայն վերջին երեք միլիարդ տարիների ընթացքում այն անապատ է եղել։