21.03.2026 | 11:30
26 երկիր, ավելի քան 100 նախագիծ, 30,000 բնակարան. «TOON EXPO» 2026-ի մասշտաբներն ընդլայնվում են․ ՏԵՍԱՆՅՈՒԹ
Տուժող-մեղադրյալը․ երիտասարդը չի ենթարկվել, պարեկներն էլ գետնին են տապալել և արցունքաբեր գազ կիրառել. ՏԵՍԱՆՅՈՒԹ
Հասարակություն
06.08.2024 | 21:45
Պարեկային ծառայության աշխատակիցների կողմից բռնության ենթարկվելու մասով հարուցված քրեական վարույթի շրջանակում Արամ Երիցյանը տուժող է ճանաչվել։ Օրեր առաջ դեպքի մասին ահազանգել էր նրա եղբայրը՝ փաստաբան Ռոման Երիցյանը։ Ըստ նրա՝ պարեկների հետ միջադեպը սկսվել էր ավտոմեքենան արգելված վայրում կայանելուց։
Ինչպես երևում է Երիցյանի կողմից ավելի ուշ հրապարակված տեսանյութում, որը պարեկային ծառայողին ամրակցված տեսախցիկի տեսագրությունից մի հատված է, Արամ Երիցյանը հրաժարվում է ձեռնաշղթաներով գնալ ոստիկանական բաժանմունք, ինչից հետո երկու պարեկ, բռնի ուժ գործադրելով, նրան պառկեցնում են ասֆալտին, ձեռնաշղթաներ հագցնում, ապա շատ մոտ տարածությունից արցունքաբեր գազ փչում Երիցյանի աչքերին։
Արդյո՞ք պարեկներն իրավական հիմք ունեին Արամ Երիցյանին ազատությունից զրկելու և հատուկ միջոց կիրառելու, հարց է բարձրացնում նրա փաստաբան Ռաֆայել Ջհանգիրյանը։ Եթե ահազանգող կողմն ակնկալում էր, որ երիտասարդը շատ արագ պետք է տուժող ճանաչվի, ապա պատկերը հակառակն է ստացվել։ Բռնության ենթարկված Երիցյանին նախ մեղադրանք է առաջադրվել պարեկային ծառայողների նկատմամբ բռնություն գործադրելու կասկածանքով։ Քննչական կոմիտեի հրապարակած 23 վայրկյան տևողությամբ տեսանյութը ևս պարեկային ծառայողի տեսագրությունից հատված է, սակայն այստեղ երևում է միայն, թե ինչպես երիտասարդը չի ենթարկվում պարեկի պահանջին։ Տեսանյութն ընդհատվում է, երբ ծառայողները գետնին են պառկեցնում Երիցյանին։
Քննչական կոմիտեի հաղորդագրության համաձայն՝ երբ պարեկային ծառայողները փորձել են ձերբակալել Արամ Երիցյանին, այդ ընթացքում երիտասարդը սկսել է հարվածներ հասցնել պարեկներից մեկի կրծքավանդակի և գլխի շրջանին։
Հինգշաբթի ձերբակալված Արամ Երիցյանն անազատության մեջ մնաց գրեթե 4 օր։ Այդ ընթացքում տուժող ճանաչվեց պարեկային ծառայողներից մեկը, իսկ բռնության ենթարկված Երիցյանի նկատմամբ դատաբժշկական փորձաքննություն նշանակվեց միայն պաշտպանական խմբի սեփական նախաձեռնությամբ։
Ավելի ուշ նախաքննական մարմինը Երիցյանին կալանավորելու միջնորդություն ներկայացրեց դատարան։ Դատավոր Նելլի Բաղդասարյանը, սակայն, ոչ միայն մերժեց միջնորդությունը, այլև Երիցյանի ձերբակալությունը ոչ իրավաչափ ճանաչեց։
Արդեն այսօր հայտնի դարձավ, որ երիտասարդը նաև տուժող է ճանաչվել, փաստացի, միաժամանակ լինելով երկու կարգավիճակում՝ տուժող-մեղադրյալ։ Ինչ հանգուցալուծում կունենան նախաձեռնված վարույթները, արդյո՞ք կողմերից մեկը որևէ պատասխանատվության կենթարկվի, ցույց կտա քննության ընթացքը։
Մանրամասները՝ տեսանյութում։
Ռոզա Վարդանյան
