Մասկը հայտարարել է երկրորդ մարդու ուղեղում չիպի ներդրման մասին

Ամերիկացի միլիարդատեր Իլոն Մասկի Neuralink ընկերությունը հաջողությամբ ներդրել է համակարգչային հաղորդակցման սարք երկրորդ կամավորի ուղեղում, որը նախատեսված է անդամալույծ մարդկանց համար, որպեսզի մտքի ուժով օգտագործեն թվային սարքավորումները։ Խոսքը ողնուղեղի վնասվածքով մարդկանց մասին է, հայտնում է Reuters-ը՝ վկայակոչելով Մասկի հայտարարությունը։

Ըստ այդ տվյալների՝ ներդրված նեյրոչիպում աշխատում է 400 էլեկտրոդ։ Neuralink-ը հայտնում է, որ չիպում օգտագործվել է 1024 էլեկտրոդ։

Ներդրված սարքն ընդունիչ պարկուճ է, որը լսողական սարքի նման ամրացված է ականջի հետևում։ Թելանման էլեկտրոդները պարկուճից անցնում են ուղեղ: Ընդհանուր առմամբ, ուղեղում տեղադրվում է մինչև 1500 էլեկտրոդ, որոնցից յուրաքանչյուրը չորս անգամ ավելի բարակ է, քան մարդու մազը: 4×4 մմ մեծությամբ մեկ պրոցեսորը մշակում է 10 հազար էլեկտրոդներից ստացված տեղեկատվություն։

2024 թվականի հունվարի վերջին ուղեղի չիպ տեղադրվեց դայվինգի ժամանակ դժբախտ պատահարի հետևանքով ուսերից ներքև կաթվածահարված տղամարդու գլխում: Նա կարողանում էր վիդեոխաղեր և շախմատ խաղալ, մտքի ուժով շարժումներ անել, օգտվել համացանցից և գրառումներ անել սոցիալական ցանցերում։

Վիրահատությունից մեկ ամիս անց մշակողները սարքում անսարքություններ են նկատել։ Ըստ The Wall Street Journal-ի (WSJ) տվյալների՝ չիպի վրա թելային էլեկտրոդների մեծ մասը տեղաշարժվել և դադարել է ազդանշաններ կարդալ: Դրանից հետո Neuralink-ը հայտարարեց չիպը երկրորդ կամավորի ուղեղում ավելի խորը ներդնելու մտադրության մասին՝ խնդրի կրկնությունից խուսափելու համար: