15.01.2025 | 20:42
Լեհաստանը նախատեսում է ԵՄ-ում իր նախագահության ընթացքում արագացնել կառույցին Ուկրաինայի անդամակցության գործընթացը
Վերացվել է Ռուսաստան ներմուծման սահմանափակումը ընկերություններից մեկի համար․ ՍԱՏՄ
Տնտեսություն
02.08.2024 | 17:50
Ռուսական կողմի հետ քննարկման արդյունքում համաձայնություն է ձեռք բերվել երկուշաբթի օրը վերացնել Ռուսաստան ներմուծման սահմանափակումը կազմակերպություններից մեկի համար, այս մասին հայտնում են ՀՀ սննդամթերքի անվտանգության տեսչական մարմնից։
Գերատեսչությունից տեղեկացնում են, որ հայկական 16 կազմակերպությունների կողմից գյուղմթերք Ռուսաստան ներմուծելու արգելանքի հետ կապված խնդիրների շուրջ այսօր տեսազրույցի ձևաչափով ՍԱՏՄ պետ Արմեն Հայրապետյանը բանակցել է ռուս գործընկերոջ հետ։
Բանակցություններն ավարտվել են, բայց ՌԴ-ն չի վերացրել հայկական որոշ մթերքների արտահանման արգելքը
Ավելի վաղ ՍԱՏՄ-ից Factor.am-ին հայտնել էին, որ ըստ ռուսական կողմի հետ պայմանավորվածության՝ ռուս մասնագետները օգոստոսի վերջին Հայաստան կգան Ռուսաստան ներմուծվող ապրանքների արտադրության, վերամշակման, պահպանման և փոխադրման վայրերում համատեղ ստուգում իրականացնելու համար։ Նրանք նաև հայ մասնագետներին են հրավիրել Մոսկվա՝ այցելել «Ռոսսելխոզնադզորի» ենթակայության լաբորատորիաներ։
Հիշեցնենք, որ հուլիսի 17-ին ՀՀ սննդամթերքի անվտանգության տեսչական մարմինը ՌԴ անասնաբուժական և բուսասանիտարական վերահսկողության դաշնային ծառայությունից («Ռոսսելխոզնադզոր») նամակ է ստացել այն մասին, որ Հայաստանից Ռուսաստան արտահանվող պտուղ-բանջարեղենի ապրիլ-հունիս ամիսների խմբաքանակներում արձանագրել է խախտումներ և որոշում կայացրել հուլիսի 15-ից ՌԴ տարածք հայաստանյան 16 ընկերությունների արտադրանքի մատակարարումը ժամանակավորապես սահմանափակելու մասին։
Նշենք, որ ՍԱՏՄ-ն ստուգումներ է անցկացնում այն ընկերություններում, որոնց արտադրանքում ռուսական կողմից խախտումներ էին արձանագրվել։
Հիշեցնենք նաև, որ լոլիկի մշակությամբ զբաղվող ընկերություններից մեկից Factor.am-ին տեղեկացրել էին, որ ռուսական կողմն իրենց ևս արգելել է բանջարեղեն արտահանել՝ պատճառաբանելով, թե արտադրանքում պեստիցիդների առկայությունը գերազանցում է թույլատրելի շեմը։ Ընկերությունից, սակայն, պնդում են, որ խախտումներ չունեն։
