Ալիևին քննադատելու համար կալանավորված ադրբեջանցի նախկին դիվանագետն ի նշան բողոքի հացադուլ է իրականացնում

Ադրբեջանցի նախկին դիվանագետ Էմին Իբրահիմովն արդեն 3-րդ օրն է, ինչ հացադուլ է հայտարարել Շուվելանի քննչական մեկուսարանում՝ բողոքելով իր անհիմն կալանավորման դեմ։ Նրա փաստաբան Ագիլ Լաիջը ադրբեջանական լրատվամիջոցներին ասել է, որ  հուլիսի 26-ին տեսակցել է նրան․ ունեցել է գունատ տեսք, ինքնազգացողությունը վատացել է, գլխացավեր են հայտնվել։ Այդուհանդերձ, Իբրահիմովը մտադիր է հացադուլ անել մինչև ազատ արձակվելը։

Փաստաբանն ասել է, որ իր պաշտպանյալը ոչ մի բուժօգնություն չի ստանում։ Իբրահիմովին պահում են 4-5 հոգու համար նախատեսված խցում, սակայն այնտեղ 10 բանտարկյալ կա, և նույնիսկ քնելու համար պայմաններ չկան։ Փաստաբանը կալանքի դեմ վերաքննիչ բողոք է ներկայացրել։

Հուլիսի 24-ին Նիզամիի դատարանը Իբրահիմովին 4 ամսով կալանավորել է։

Հուլիսի 22-ի կեսօրին Բաքվի  մետրոյի «Խալգլար Դոստլուղու» կայարանի մոտ անհայտ անձը հարձակվել էր Իբրահիմովի վրա, իսկ քաղաքացիական հագուստով ուժայինները անմիջապես հայտնվել էին դեպքի վայրում։ Նրանք Իբրահիմովին բերման էին ենթարկել և տարել ոստիկանական բաժանմունք, նրա նկատմամբ կիրառել  էլեկտրաշոկեր, որպեսզի ստիպեն հայտնի սմարթֆոնի անվտանգության կոդը։

Նրան մեղադրանք է առաջադրվել քրեական օրենսգրքի 126.2.4 (խուլիգանական դրդապատճառներով առողջությանը ծանր վնաս պատճառելը) և 221.1 (խուլիգանություն) հոդվածներով։

Փաստաբանի խոսքով՝ ոստիկանությունը պնդում է, որ Իբրահիմովը դանակահարել է բնակիչ Քամալ Շյուքուրովին։ Իբրահիմովը հերքում է մեղադրանքները։

Էմին Իբրահիմովը 2007-2020 թթ-ին դիվանագիտական ​​ծառայության մեջ է եղել, 2012-2016 թթ. եղել է ԱՄՆ-ում Ադրբեջանի դեսպանատան երկրորդ քարտուղարը, 2016-2020 թթ.-ին ՝Ուրուգվայում Ադրբեջանի գործերի ժամանակավոր հավատարմատար։

Ի նշան բողոքի՝ 2020 թվականի խորհրդարանական ընտրությունների կեղծման դեմ՝ Իբրահիմովը հրաժարական  է տվել  դիվանագիտական ​​ծառայությունից ու հեռացել ԱԳՆ-ից։

Սոցիալական ցանցերում նա պարբերաբար  կոշտ քննադատում է Ադրբեջանի նախագահ Իլհամ Ալիևին, իշխանություններին վարած քաղաքականության համար, այդ թվում՝ Հայաստանի ու Արևմուտքի հետ հարաբերություններում։  Իրավապաշտպաները նրան կալանավորման պատճառը համարում են նրա վերլուծական աշխատանքն ու քննադատությունները։

Իբրահիմովը նաև ձերբակալվել էր 2023 թվականի սեպտեմբերին։ Այն ժամանակ նա դատապարտվել էր 30-օրյա վարչական կալանքի։ Նախկին դիվանագետը հայտարարել էր, որ իր ձերբակալության պատճառը սոցիալական ցանցերում քննադատական գրառումներն են։  Իբրահիմովը քննադատական գրառում էր արել նաև 2023 թ-ի սեպտեմբերի 19-ին Բաքվի կողմից Արցախի դեմ իրականացված ռազմական ագրեսիայի հետ կապված։  Նա նշել էր, որ  ԼՂ-ի վրա Բաքվի ագրեսիան իրականացվել է ռուսական շահերի շրջանակում։

Էմմա Չոբանյան