22.11.2024 | 14:15
Եղանակը կցրտի․ առաջիկա օրերին բարձրադիր շրջաններում ձյուն է սպասվում
Քրեակատարողական ծառայության պետ Ամբակում Գրիգորյանն առցանց աշխատանքային հանդիպում է անցկացրել Europris-ի ներկայացուցիչների հետ
Հասարակություն
23.07.2024 | 14:44
ՀՀ ԱՆ քրեակատարողական ծառայության պետ, արդարադատության գնդապետ Ամբակում Գրիգորյանը հուլիսի 22-ին առցանց հանդիպում է ունեցել Europris-ի (Բանտային և ուղղիչ ծառայությունների եվրոպական կազմակերպություն) գործադիր տնօրեն Գուստավ Տալվինգի և հաղորդակցության ղեկավար Բրոդի Բեյվիջի հետ։ Հանդիպմանը ներկա է եղել նաև Ծառայության շտաբի գլխավոր մասնագետ, կապիտան Ռաֆայել Հարությունյանը․ տեղեկացնում են ՀՀ ՔԿԾ-ից։
Եվրոպական գործընկերները ներկայացրել են Կազմակերպության նպատակները, առաքելությունը, տեսլականն ու արժեքները, ինչպես նաև՝ իրենց ակնկալիքները Հայաստանից որպես կառույցի լիիրավ անդամ։
Ծառայության պետ Ամբակում Գրիգորյանը նախ՝ շնորհակալություն է հայտնել համագործակցության համար, ապա՝ հույս հայտնել, որ ակտիվ համագործակցությունը Կազմակերպության հետ նոր ընթացք կհաղորդի Հայաստանի քրեակատարողական ոլորտի բարեփոխումներին։
Հիշեցնենք, որ ՀՀ ԱՆ քրեակատարողական ծառայությունը պաշտոնապես հանդիսանում է Europris-ի անդամ։ Կառույցին, բացի Հայաստանից, անդամակցում են Եվրոպայի խորհրդի ևս 39 անդամ երկրների քրեակատարողական մարմիններ։
Europris-ին անդամակցությունը տալիս է մի շարք առավելություններ, մասնավորապես՝ հասանելիություն առցանց ծառայություններին ու համակարգերին, ինչպիսիք են EPIS-ը (եվրոպական բանտային տեղեկատվական համակարգ) և KMS-ն (գիտելիքների կառավարման համակարգ), լավագույն փորձի և տեղեկատվության փոխանակում, փորձագիտական աջակցության տրամադրում և այլն։
