09.09.2026 | 20:19
«Առգրավումներն իրականացվել են կամայականորեն՝ շոուի նպատակով». Գագիկ Խաչատրյանի պաշտպանական կողմը՝ ՔԿ-ի գործողությունների մասին
Մամիկոն Ասլանյանն ազատ կարձակվի 10 մլն գրավի դիմաց
Հասարակություն
15.07.2024 | 19:51
Վանաձոր համայնքի ղեկավար Մամիկոն Ասլանյանը 10 միլիոն գրավի դիմաց ազատ կարձակվի։ Հակակոռուպցիոն դատարանը քիչ առաջ որոշում է կայացրել մասնակի բավարարել պաշտպանական կողմի՝ խափանման միջոցը փոխելու մասին միջնորդությունը:
«Մենք միջնորդել էինք դատարանին վերացնել Մամիկոն Ասլանյանի նկատմամբ ընտրված խափանման միջոց կալանքը և կիրառել ստորագրություն չհեռանալու մասին։ Դատարանը, փաստացի, այն բավարարեց մասնակի։ Այս պահին 10 միլիոն գումարն ենք հավաքում, որ վճարենք: Որ պահին վճարենք, այդ պահին Մամիկոն Ասլանյանն ազատության մեջ կլինի»,- FactorTV-ի հետ զրույցում ասաց Ասլանյանի պաշտպան Արտակ Ոսկանյանը։
Վանաձոր համայնքի ղեկավարն անազատության մեջ է 2021 թվականի դեկտեմբերից։ Մամիկոն Ասլանյանին մեղադրանք է առաջադրվել պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական կեղծիքի հատկանիշներով։
Ըստ մեղադրական եզրակացության՝ Մամիկոն Ասլանյանը, 2016 թվականի հոկտեմբերի 10-ից մինչև 2021 թվականի հոկտեմբերի 10-ն ընկած ժամանակահատվածում զբաղեցնելով ՀՀ Լոռու մարզի Վանաձոր համայնքի ղեկավարի պաշտոնը, հանդիսանալով տեղական ինքնակառավարման մարմնում մշտապես իշխանության ներկայացուցչի գործառույթներ իրականացնող գործադիր մարմնի, ինչպես նաեւ համայնքապետարանում կազմակերպական-տնօրինչական գործառույթներ իրականացնող պաշտոնատար անձ, չարաշահել է իր պաշտոնական լիազորությունները, դիտավորությամբ ակնհայտորեն դուրս է եկել իր լիազորությունների շրջանակից և կատարել է պաշտոնական կեղծիք:
Այս պահին քրեական գործով կալանավորված է միայն Մամիկոն Ասլանյանը, մյուսների նկատմամբ որպես խափանման միջոց է ընտրվել ստորագրությունը՝ չհեռանալու մասին։
Մամիկոն Ասլանյանն իրեն առաջադրված մեղադրանքը չի ընդունում։ Ըստ նրա՝ իր նկատմամբ քաղաքական հետապնդում է իրականացվում։
Ռոզա Վարդանյան
