Ադրբեջանում 44-օրյա պատերազմի հերթական մասնակիցն է ինքնահրկիզվել

Ադրբեջանում Արցախյան 44-օրյա պատերազմի մասնակիցների շրջանում ինքնահրկիզման հերթական դեպքն է տեղի ունեցել։ Ջալիլաբադի շրջանի Գյոյթեփեի բնակիչ, պատերազմի մասնակից (1999թ․ ծնված) Էլնուր Ալիևն ինքնահրկիզվել է շրջանի գործադիր իշխանության շենքի մոտ, գրում են տեղական լրատվամիջոցները։

Նշվում է, որ Ալիևը լուրջ վնասվածքներով տեղափոխվել է Բաքվի 5-րդ քաղաքային կլինիկական հիվանդանոցի այրվածքների բաժանմունք։ Նրա վիճակը գնահատվում է միջին ծանրության։

Լրատվամիջոցները գրում են, թե Ալիևն ամուսնության նպատակով աղջկա է փախցրել Մասալայի շրջանից։ Աղջկա ընտանիքը դեմ է եղել և դատի է տվել Էլնուր Ալիևին։ Ընտանիքը պահանջում է փոխհատուցում 11,000 մանաթի չափով։ Չնայած նախնական համաձայնությանը՝ աղջիկը դատարանում հանդես է եկել նաև որպես հայցվոր։ Ալիևը, վախենալով ձերբակալությունից, ինքնահրկիզվել է։

Ընդգծվում է, որ պատերազմից հետո նրա հոգեբանական վիճակն անկայուն է եղել։

Հավելենք, որ վերջերս Աղստաֆայում ինքնահրկիզված պատերազմի մասնակից Էլվին Ալիևը մահացել է։ 32-ամյա Ալիևը մահացել է հունիսի 23-ին Բաքվի Այրվածքների կենտրոնում։ Հունիսի սկզբին էլ 44-օրյա պատերազմի մեկ այլ մասնակից էր ինքնահրկիզվել։ Դաշքեսանում Չիրաղլի գյուղի բնակիչ 28-ամյա Ադալեթ Իսմայիլովը բենզին էր լցրել իր վրա ու ինքնահրկիզվել։ Նա նույնպես Բաքվի հիվանդանոցներից մեկում մահացել է։

Արցախի դեմ սանձազերծված 44-օրյա պատերազմի ադրբեջանցի մասնակիցների շրջանում ինքնասպանության դեպքերի թիվը, ըստ տարբեր տեղեկությունների, գերազանցում է 80-ը։ Նրանք կյանքին վերջ են տվել հիմնականում ինքնահրկիզման, կախվելու միջոցով, 50-ից ավելին էլ ինքնասպանության փորձ է կատարել։

Էմմա Չոբանյան