05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Ադրբեջանում պատգամավորի թեկնածու առաջադրվելու հայտ է ներկայացրել 155 մարդ, հաստատվել է 71-ը
Քաղաքականություն
09.07.2024 | 22:53
Ադրբեջանում պատգամավորի թեկնածու առաջադրվելու հայտ է ներկայացրել 155 մարդ, նրանցից 71-ի թեկնածությունը հավանության է արժանացել, հայտարարել է Ադրբեջանի Կենտրոնական ընտրական հանձնաժողովի նախագահ Մազահիր Փանահովը։
Նա նշել է, որ նախապես առաջադրվել է 156 մարդ, սակայն ավելի ուշ նրանցից 1-ը հանել է թեկնածությունը։ Առաջադրված 155 անձանցից հաստատվել է 71-ը, որոնցից 43-ը ստորագրությամբ թերթիկներ է ստացել։
Ընդդիմադիր «Մուսավաթ» և «Հանրապետական այլընտրանք» (ReAl) կուսակցությունները հրապարակել են Մեջլիսի արտահերթ ընտրություններում պատգամավորության իրենց թեկնածուների ցուցակները։
«Մուսավաթ» կուսակցությունը ներկայացրել է 27 ընտրատարածքի իր թեկնածուների ցուցակը։
ReAl կուսակցությունը հայտարարել է 13 ընտրատարածքներում թեկնածուներ առաջադրելու մասին։ Նրանց թվում են կուսակցության ղեկավար Իլգար Մամեդովը, քաղաքական հանձնաժողովի անդամ Նաթիգ Ջաֆարլին, փաստաբան Ռասուլ Ջաֆարովը, 6-րդ գումարման Միլլի Մեջլիսի պատգամավոր Էրկին Գադիրլին, ճարտարապետ Էլչին Ալիևը և այլք։
Հունիսին երկու կուսակցություններն էլ մասնակցել էին Ադրբեջանի նախագահականի կողմից կազմակերպված տարբեր կուսակցությունների և իշխանության ներկայացուցիչների հանդիպմանը։ Սա քննադատությունների առիթ էր տվել։ Հանդիպումից հետո ակտիվացել են լուրերը, որ երկու ուժերն էլ մասնակցելու են արտահերթ խորհրդարանական ընտրություններին։
Հիշեցնենք՝ հունիսի 28-ին Ադրբեջանի նախագահ Իլհամ Ալիևը հրամանագիր էր ստորագրել երկրի վեցերորդ գումարման Միլլի Մեջլիսը ցրելու և արտահերթ ընտրություններ նշանակելու մասին։ Ալիևը խորհրդարանի արտահերթ ընտրությունները նշանակել է 2024 թվականի սեպտեմբերի 1-ին։ Երկրի Սահմանադրական դատարանի պլենումն ավելի վաղ քննարկել էր Ալիևի դիմումը Միլլի Մեջլիսը ցրելու և արտահերթ ընտրություններ նշանակելու վերաբերյալ՝ որոշելով, որ այն համապատասխանում է Սահմանադրությանը։
Էմմա Չոբանյան
