07.10.2026 | 22:33
Երևանի և 9 մարզի մի շարք հասցեներում էլեկտրաէներգիայի անջատումներ կլինեն
Ուկրաինան և Լեհաստանն անվտանգության ոլորտում համագործակցության պայմանագիր են ստորագրել
Քաղաքականություն
08.07.2024 | 22:59
Ուկրաինայի նախագահ Վլադիմիր Զելենսկին և Լեհաստանի վարչապետ Դոնալդ Տուսկը համաձայնագիր են ստորագրել անվտանգության ոլորտում համագործակցության և Ուկրաինային երկարաժամկետ աջակցության մասին։ Այս մասին հայտնում է Ուկրաինայի նախագահի մամուլի ծառայությունը, փոխանցում է Current time-ը։
Փաստաթուղթը նախատեսում է լեհական հակաօդային պաշտպանության ուժերի համար ուկրաինական օդային տարածքում Լեհաստանի ուղղությամբ արձակված հրթիռները և անօդաչու սարքերը որսալու մեխանիզմի մշակում։ Նաև, համաձայն պայմանագրի, Լեհաստանի տարածքում կկազմակերպվի նոր կամավորական ստորաբաժանման՝ «Ուկրաինական լեգեոնի» վերապատրաստում, որին կկարողանան միանալ արտերկրի ուկրաինացիները։
Վարշավան նաև կկարողանա Կիև տեղափոխել ՄիԳ-29 կործանիչների էսկադրիլիա (14 ինքնաթիռ) այն բանից հետո, երբ ՆԱՏՕ-ի երկրները Լեհաստանին նոր կործանիչներ տրամադրեն։
Ուկրաինան և Լեհաստանը նաև պայմանավորվել են ամրապնդել համագործակցությունը ռազմարդյունաբերական ոլորտում, այդ թվում՝ լեհական պաշտպանական ընկերությունների արտադրական օբյեկտների տեղակայում ուկրաինական տարածքում, զենքի ու զինամթերքի համատեղ արտադրություն կազմակերպում։
Ավելի վաղ Ուկրաինան նման համաձայնագրեր էր կնքել ԱՄՆ-ի, ԵՄ-ի, ինչպես նաև Ճապոնիայի և մի շարք եվրոպական երկրների, այդ թվում՝ Գերմանիայի, Ֆրանսիայի և Մեծ Բրիտանիայի հետ։
