21.07.2026 | 22:27
Բեռլինում Մերցի հետ հանդիպման ժամանած Ալիևին ադրբեջանցիները դիմավորել են «բռնապետ» վանկարկումներով․ ՏԵՍԱՆՅՈՒԹ
Թուրքիայի Կայսերիում սիրիացի ներգաղթյալների ջարդ է տեղի ունեցել․ տներ ու մեքենաներ են հրկիզել
Քաղաքականություն
01.07.2024 | 12:03
Թուրքիայի Կայսերի քաղաքում 5-ամյա երեխային բռնության ենթարկելու մասին պնդումներից հետո քաղաքում իսկական ջարդ է սկսվել սիրիացի ներգաղթյալների դեմ։ Մելիքգազի շրջանի Դանիշմենթգազի թաղամասում ամբոխը դուրս է եկել փողոցներ, սկսել կոտրել և հրկիզել սիրիացիների մեքենաները, տներն ու խանութները, հայտնում են տեղական լրատվամիջոցները։
Ուժայինները շրջափակել են թաղամասը, որտեղ տեղի են ունեցել այս իրադարձությունները, դեպքի վայր է մեկնել Կայսերիի նահանգապետ Գյոքմեն Չիչեքը՝ քաղաքացիներին հանդարտեցնելու համար։ Նա հայտնել է, որ 5 ոստիկաններ, որոնք փորձել են միջամտել իրադարձություններին, վիրավորվել են։
«Ես լավ եմ հասկանում ձեր զայրույթը։ Գիտեմ, որ իսկապես բարկացած եք, և որ այս միջադեպը զազրելի դեպք է։ Ես ձեզ խոստանում եմ՝ այլևս երբեք նման խայտառակություն չի լինի։ Մենք կանենք դրա համար անհրաժեշտ ամեն ինչ։ Թույլ մի տվեք, որ որևէ մեկը վիրավորվի այստեղ: Այս պահին մեր ոստիկաններից 5-ը վիրավոր են։ Պետությունն անելու է այն, ինչ անհրաժեշտ է մինչև վերջ։ Ուզում եմ, որ բոլորը ցրվեն»,- հայտարարել է նահանգապետը։
Նշվում է նաև, որ ոստիկանության կողմից օտարերկրյա քաղաքացի է բերման ենթարկվել երեխայի նկատմամբ բռնության ենթարկելու համար։ Ընտանիքի և սոցիալական ծառայությունների նախարարությունից հայտնել են նաև, որ երեխան և նրա ընտանիքը պաշտպանված են, ցուցաբերվել է համապատասխան աջակցություն։
Էմմա Չոբանյան
