Ռիսկի՞ դիմել, թե՞ բավարարվել ունեցածով․ խնդրահարույց որոշում՝ հաշմանդամություն ունեցող անձանց համար․ ՏԵՍԱՆՅՈՒԹ

Այսուհետ, եթե հաշմանդամություն ունեցող անձը դիմի պետությանը հերթական աջակցության համար, ապա ստիպված կլինի նորից անցնել գնահատման համակարգով։ Նման որոշում է ընդունել Կառավարությունը։ Որոշումը, ըստ մասնագետների, մեծ ռիսկեր է պարունակում։

Եթե հաշմանդամություն ունեցող անձը դիմի սոցիալական ծառայության կամ աջակցող սարքեր ստանալու համար, նրան կառաջարկվի նորից անցնել հաշմանդամության սահմանման գործընթացով, եթե, իհարկե, չունենա ծառայությունների անհատական ծրագիր:

«Ունիսոն» հասարակական կազմակերպության ղեկավար Արմեն Ալավերդյանն այսօր ունի հաշմանդամության խոր կարգ, որը համարժեք է նախկին 1-ին կարգին։ Եթե առաջիկայում Ալավերդյանը, օրինակ, նոր սայլակ ստանալու համար դիմի, ապա պետք է նորից հետազոտություն անցնի։

«Հայաստանի Հանրապետության կառավարության 2022 թվականի հուլիսի 28-ի N 1180-Ն որոշման մեջ լրացումներ և փոփոխություններ կատարելու մասին» ՀՀ կառավարության որոշման նախագիծը ներկայացրել է Աշխատանքի և սոցիալական հարցերի նախարարությունը՝ նշելով, որ այն պայմանավորված է իրավակիրառ պրակտիկայում ի հայտ եկած խնդիրների կարգավորման անհրաժեշտությամբ։

«Հաշմանդամություն ունեցող անձանց իրավունքների օրակարգ» ՀԿ նախագահ Մուշեղ Հովսեփյանը, սակայն, շեշտում է՝ որոշումը չի լուծի դրանք։

Նախարարության կողմից ներկայացված նախագծով առաջարկվել էր վերանայել օրգանիզմի ֆունկցիաները և մարմնի կառուցվածքը, անձի գործունեությունը և մասնակցությունը գնահատող մասնագետների ցանկը՝ ֆունկցիոնալության գնահատման ընթացքում ի հայտ եկած խնդիրները լուծելու նպատակով։

«Ունիսոն»-ի ղեկավարը, սակայն, ընդգծում ՝ փոփոխությունը չպետք է հետադարձ ուժ ունենա։ Ալավերդյանը մտավախություն ունի, որ նոր փոփոխությունն անգամ կարող է իր և հաշմանդամության խոր կարգ ունեցող մյուս անձանց վրա ազդել։ Ստացվում է, որ Կառավարությունն ասում է՝ բավարարվում եք ունեցածով կամ ձեզ անհրաժեշտ սարքերի ու ծառայությունների համար ռիսկի գնում:

Հատկանշական է, որ խոցելի խմբի մասին գրված նախագիծը չի քննարկվել շահարգրգիռ կողմերի հետ, այն միայն հանրային քննարկման է դրվել e-draft իրավական ակտերի, նախագծերի հրապարակման միասնական կայքում։ Ավելին, նախագծի մասին «Հաշմանդամություն ունեցող անձանց իրավունքների օրակարգ» ՀԿ-ի կողմից ներկայացված երկու առաջարկներն այդպես էլ չեն ընդունվել։ Ուշագրավ է, որ այն կարծիքի չի ներկայացվել նաև Մարդու իրավունքների պաշտպանին։

Մանրամասները՝ տեսանյութում։

Ռոզա Վարդանյան