20.02.2026 | 13:53
Մեղրի համայնքին է վերադարձվել շուրջ 3.15 հա մակերեսով 6 հողամաս. Դատախազություն
Թուրքիան ողջունում է ՀԱՄԱՍ-ի և Իսրայելի միջև հրադադարի համաձայնությունը՝ խոստանալով շարունակել աջակցությունը Պաղեստինին
Քաղաքականություն
16.01.2025 | 14:26
Անկարան ողջունում է ՀԱՄԱՍ-ի և Իսրայելի միջև ձեռք բերված հրադադարի համաձայնությունը։ Այս մասին ասվում է Թուրքիայի ԱԳՆ-ի հայտարարության մեջ։
«Մենք ցանկանում ենք մեր երախտագիտությունը հայտնել միջնորդ երկրներին, մասնավորապես, Կատարին և Եգիպտոսին՝ իրենց ջանքերի համար։ Հետագա գործընթացում էական է, որ համաձայնագրի բոլոր փուլերն ամբողջությամբ իրականացվեն, հրադադարը դառնա մշտական, և մարդասիրական օգնությունը շտապ հասցվի Գազա: Միջազգային հանրությունը պետք է ապահովի, որ Իսրայելը կատարի իր պարտականություններն այս հարցերում»,- ասվում է հայտարարության մեջ։
Անկարան նշում է, որ Մերձավոր Արևելքում տևական խաղաղություն և կայունություն կարող է ձեռք բերվել միայն Պաղեստինում խաղաղություն հաստատելու և պաղեստինյան ժողովրդի կրած անարդարությանը վերջ դնելու միջոցով:
«Խաղաղության բանակցությունները պետք է անհապաղ սկսվեն՝ 1967 թվականի սահմանների հիման վրա Պաղեստինի անկախ, ինքնիշխան և շարունակական պետություն ստեղծելու համար, որի մայրաքաղաքն է Արևելյան Երուսաղեմը։ Թուրքիան կշարունակի աջակցել Պաղեստինի ժողովրդին գալիք ժամանակահատվածում»,- ընդգծում է Թուրքիայի ԱԳՆ-ն։
Երկրի նախագահ Ռեջեփ Թայիփ Էրդողանն էլ հույս է հայտնել, որ Գազայի հատվածում հրադադարի մասին համաձայնագիրը ճանապարհ կհարթի դեպի տևական խաղաղություն և կայունություն «պաղեստինցի եղբայրների ու քույրերի», ինչպես նաև տարածաշրջանի և ամբողջ մարդկության համար:
X-ում գրառման մեջ Էրդողանն ասել է, որ Թուրքիան կշարունակի կանգնել Գազայի կողքին և «մոբիլիզացնելու է բոլոր միջոցները՝ օգնելու Գազային բուժվել և ոտքի կանգնել»:
«Մենք ողջունում ենք հերոս ժողովրդին և Գազայի քաջարի որդիներին ու դուստրերին, որոնք խիզախորեն պաշտպանում են իրենց հողն ու ազատությունը Իսրայելի անօրինական և անմարդկային հարձակումների դեմ»,- ասել է Էրդողանը՝ հավելելով, որ Թուրքիան միշտ աջակցել է պաղեստինցիներին ճնշումների դեմ պայքարում։
Թարգմանությունը՝ Էմմա Չոբանյանի
