30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Թուրքիայի հետախուզական ծառայությունը Գերմանիայում լրտեսում է Գյուլենի հետևորդներին ու PKK-ի կողմնակիցներին
Քաղաքականություն
21.06.2024 | 23:09
Գյուլենական շարժման հետևորդները և Քուրդիստանի աշխատավորական կուսակցության (PKK) կողմնակիցները Գերմանիայում թուրքական հետախուզական գործակալների հիմնական թիրախն են։ Այս մասին ասվում է Գերմանիայի ներքին գործերի նախարարության զեկույցում, գրում է Turkish Minute-ը։
Սահմանադրության պաշտպանության դաշնային գրասենյակը (BfV) հրապարակել է իր 2023 թվականի զեկույցը, որը ներկայացրել են Գերմանիայի ներքին գործերի նախարար Նենսի Ֆասերը և BfV-ի նախագահ Թոմաս Հալդենվանգը Բեռլինում կայացած մամուլի ասուլիսում։
BfV-ի հրապարակած զեկույցում, որի հիմնական նպատակներն են Գերմանիայում աջ և ձախ ծայրահեղականների և ծայրահեղական օտարերկրացիների հակասահմանադրական գործունեության մոնիթորինգն ու վերլուծությունը, ինչպես նաև այլ երկրների կողմից լրտեսության կանխումը, նկարագրում է Թուրքիայի հետախուզական ծառայությունները՝ չնշելով Ազգային հետախուզական կազմակերպությունը (MİT), որը կենտրոնական տեղ է զբաղեցնում թուրքական պետական ապարատում։
«Հետախուզության հիմնական թիրախն այն կազմակերպություններն են, որոնց Թուրքիան համարում է ծայրահեղական կամ ահաբեկչական, ինչպիսին է իսլամական քարոզիչ Ֆեթուլլահ Գյուլենի շարժումը։ Նրանց թվում է Քրդստանի աշխատավորական կուսակցությունը (PKK), որը Թուրքիայի, Եվրամիության և ԱՄՆ-ի կողմից ներառված է ահաբեկչական կազմակերպությունների ցանկում»,- ասվում է զեկույցում։
Թուրքիայի կառավարությունը Գյուլենի շարժմանը մեղադրում է 2016-ի անհաջող հեղաշրջման փորձը կազմակերպելու համար՝ այն անվանելով «ահաբեկչական կազմակերպություն», թեև շարժումը կտրականապես հերքում է հեղաշրջման փորձին կամ ահաբեկչական գործունեության որևէ առնչություն։
2016 թվականից ի վեր Թուրքիայում տասնյակ հազարավոր մարդիկ են ձերբակալվել, որոնց կասկածում են կրոնական խմբավորման հետ կապ ունենալու մեջ, մինչդեռ Գյուլենի հազարավոր հետևորդներ փախել են Թուրքիայից՝ ապաստան փնտրելով Եվրոպայում և այլ երկրներում՝ խուսափելու կառավարության կողմից իրականացվող ճնշումներից: Թուրքիան տարիներ շարունակ բազմիցս հորդորում է Գերմանիայի իշխանություններին միջոցներ ձեռնարկել Գյուլենի կողմնակիցների դեմ, որոնք ապաստան են խնդրել երկրում։
Ի տարբերություն PKK-ի՝ Գյուլենի շարժումն Արևմուտքի կողմից չի ճանաչվում որպես ահաբեկչական կազմակերպություն։
Ըստ գերմանական զեկույցի՝ թուրքական հետախուզական ծառայությունները հնարավորություն ունեն գաղտնի տեղեկատվություն հավաքագրել իրենց թիրախների մասին՝ շնորհիվ զգալի թուրքական համայնքի և բազմաթիվ թուրքական կազմակերպությունների ու հաստատությունների, ինչպես նաև երկրում մեծ թվով դիվանագիտական ներկայացուցչությունների:
Գերմանիայի թուրք բնակչությունը գնահատվում է ավելի քան 3 միլիոն։ Զեկույցում նաև նշվում է բազմաթիվ ձերբակալությունների և կալանավորումների, ինչպես նաև Գերմանիայից Թուրքիա ճանապարհորդների մուտքի և ելքի արգելքների մասին՝ պնդելով, որ դրանք վկայում են քրեական հետապնդման նկատմամբ թուրքական պետական իշխանությունների բարձր հետաքրքրության մասին:
«Ուշադրության կենտրոնում են այս մարդկանց իրական կամ ենթադրյալ գործողությունները Թուրքիայում ահաբեկչական դասակարգված կազմակերպությունների համար, ինչպիսիք են PKK-ն կամ Գյուլենի շարժումը։ Գերմանիան մնում է թուրքական հետախուզական ծառայությունների առաջնային թիրախներից մեկը։ Նրանք բարձր մակարդակով շարունակում են իրենց հետախուզական գործունեությունը։ Ակնկալվում է նաև, որ Գերմանիայում թուրքական պետությանը կամ կառավարությանն առնչվող կազմակերպությունների ազդեցությունը կշարունակվի»,- ասվում է զեկույցում։
Էմմա Չոբանյան
