29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Ալիևը Բլինքենի հետ զրույցում բողոքել է ԵԱՀԿ Մինսկի խմբի գոյությունից ու ՀՀ Սահմանադրությունից
Քաղաքականություն
21.06.2024 | 11:02
ԱՄՆ պետքարտուղար Էնթոնի Բլինքենի ու Ադրբեջանի նախագահ Իլհամ Ալիևի նախօրեին տեղի ունեղած հեռախոսազրույցի վերաբերյալ հաղորդագրության է տարածել ադրբեջանական կողմը: Մասնավորապես, նշվում է, որ հեռախոսազրույցի ընթացքում Բլինքենը բարձր է գնահատել Հայաստանի և Ադրբեջանի միջև խաղաղության օրակարգի առաջմղման ուղղությամբ ձեռք բերված արդյունքները, ընդգծել, որ Միացյալ Նահանգները հաստատակամ է շարունակել աջակցել երկու երկրների միջև հարաբերությունների կարգավորման գործընթացին և կողմերին կոչ արել առաջիկայում ստորագրել խաղաղության պայմանագիրը։
Ալիևն էլ նշել է, թե «տարածաշրջանում խաղաղություն է ապահովվել, խաղաղության համաձայնագրի հիմքում ընկած սկզբունքները և դրա տեքստի նախաձեռնողը ադրբեջանական կողմն է, և ասել, թե երկկողմանի հիմունքներով շարունակվում են կարգավորման գործընթացն ու խաղաղության օրակարգն առաջ մղելու ջանքերը»։
«Բարձր գնահատելով խաղաղության օրակարգին նպաստելու ԱՄՆ վճռականությունը՝ Ալիևը նշել է Հայաստանի սահմանադրության, համապատասխան օրենքների և ներքին կանոնակարգերի հիման վրա Ադրբեջանի դեմ տարածքային պահանջների դադարեցման կարևորությունը՝ խաղաղության օրակարգի առաջմղման տեսանկյունից։ Ալիևը հավելել է, որ վաղուց եկել է ժամանակը պաշտոնապես դադարեցնելու ԵԱՀԿ Մինսկի խմբի և դրան առնչվող բոլոր կառույցների գործունեությունը, որպեսզի ամբողջությամբ փակվի անցյալի մնացուկ հանդիսացող հակամարտության էջը»,-ասվում է հաղորդագրության մեջ։
Ալիևը նաև անդրադարձել է էներգետիկայի ոլորտում երկրների միջև «բազմամյա հաջող համագործակցությանը, գոհունակություն հայտնել կլիմայի փոփոխության և COP29-ի նախապատրաստման գործընթացի շրջանակներում երկրների պատվիրակությունների արդյունավետ համագործակցության կապակցությամբ և շնորհակալություն հայտնել ԱՄՆ-ին»։ Նա ասել է, որ Բաքուն նույնպես կարևորում է ԱՄՆ-ի հետ հարաբերությունները և աջակցում է երկկողմ հարաբերությունների հետագա ամրապնդմանը և որակական նոր մակարդակի բարձրացմանը։
Հեռախոսազրույցի ընթացքում գոհունակություն է հայտնվել երկրների միջև ամենաբարձր մակարդակով նամակների փոխանակման, պատվիրակությունների փոխայցելությունների մասով, մտքերի փոխանակում է տեղի ունեցել նաև այնպիսի հարցերի շուրջ, ինչպիսիք են մարդու իրավունքները և ժողովրդավարությունը, երկրների ներքին օրենքների գերակայության հարգումը։
Հավելենք, որ ԱՄՆ Պետքարտուղարության հաղորդագրության համաձայն՝ Բլինքենը կրկին հորդորել է Ադրբեջանին հարգել միջազգային պարտավորությունները և ազատ արձակել բոլոր անարդարացի ձերբակալվածներին։ Նա կոչ է արել Ադրբեջանին դա անել որքան հնարավոր է արագ։ Ըստ ամերիկյան կողմի՝ Բլինքենը Ալիևի հետ հեռախոսազրույցում ընդգծել է Հայաստանի հետ առանց հապաղելու խաղաղության համաձայնագրի կնքման կարևորությունը։
Էմմա Չոբանյան
