ՄԱԿ-ի մարդու իրավունքների հանձնակատար Վոլքեր Թյուրկը կոչ է արել Ադրբեջանի իշխանություններին վերանայել ձերբակալված լրագրողների և ակտիվիստների գործերը և ազատ արձակել առանց պատճառի կալանավորվածներին, գրում են ադրբեջանական լրատվամիջոցները։
«Ես կոչ եմ անում Ադրբեջանի իշխանություններին վերանայել լրագրողների, ակտիվիստների և բոլոր այլ անձանց գործերը, որոնք անարդարացիորեն զրկվել են ազատությունից՝ համաձայն մարդու իրավունքների միջազգային իրավունքի, և ապահովել նրանց պաշտպանությունը դաժան վերաբերմունքից։ Բոլոր այն անձինք, ովքեր անարդարացիորեն ձերբակալվել են, պետք է անհապաղ ազատ արձակվեն»,- ասել է Թյուրկը Ժնևում ՄԱԿ-ի Մարդու իրավունքների խորհրդի 56-րդ նստաշրջանի բացման ժամանակ ունեցած ելույթում։
Նշենք, որ «Ադրբեջանի քաղբանտարկյալների ազատության միությունն» օրերս հրապարակել էր երկրում քաղբանտարկյալների նոր ցուցակը, որում ներառված է 303 մարդ։ Նախորդ ցուցակի համեմատ՝ քաղբանտարկյալների թիվն ավելացել է 16-ով։ 2000-ականների սկզբից ի վեր առաջին անգամ Ադրբեջանում քաղբանտարկյալների թիվը գերազանցել է 300-ը։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող երկու տասնյակից ավելի լրագրողներ, ընդդիմադիր գործիչներ ու քաղաքական ակտիվիստներ։ Միջազգային կազմակերպությունները, այդ թվում՝ ԱՄՆ Պետքարտուղարությունը, պարբերաբար կոչ են անում Ադրբեջանի իշխանություններին վերջ տալ երկրում բռնաճնշումների ալիքին և ազատ արձակել անարդարացի բանտարկվածներին։
Օրերս էլ ԵՄ արտաքին կապերի և անվտանգության ծառայության խոսնակ Պետեր Ստանոն հայտարարություն էր տարածել Ադրբեջանում ներման ակտի ու մարդու իրավունքների իրավիճակի վերաբերյալ։ ԵՄ-ն Բաքվին կոչ էր արել դադարեցնել ճնշումներն ու ազատ արձակել քաղբանտարկյալներին։
