Սերբիայի ՊՆ ղեկավարը Բաքվում ռազմատեխնիկական համագործակցության հարցեր է քննարկել

Ադրբեջանի պաշտպանության նախարար, գեներալ-գնդապետ Զաքիր Հասանովի հրավերով պաշտոնական այցով Բաքու է ժամանել Սերբիայի պաշտպանության նախարար Բրատիսլավ Գաշիչի գլխավորած պատվիրակությունը։ Ադրբեջանի ՊՆ-ի հաղորդմամբ՝ հանդիպմանը Հասանովը նշել է, որ Ադրբեջանի և Սերբիայի միջև ռազմավարական գործընկերության հիման վրա հաստատված հարաբերությունները բարձր մակարդակի վրա են, նաև ընդգծել համատեղ ռազմական համագործակցության հետագա զարգացման կարևորությունը։

Անդրադառնալով տարածաշրջանում տիրող իրավիճակին՝ նա հայտարարել է, թե Արցախում իրականացված էթնիկ զտումից հետո «հայկական զինված ուժերի կազմավորումները և հայկական անօրինական զինված խմբավորումներն ամբողջությամբ դուրս են բերվել Ադրբեջանի տարածքից»։

Հասանովը Գաշիչին հրավիրել է 2024 թվականի սեպտեմբերին Բաքվում կայանալիք Ադրբեջանի 5-րդ միջազգային պաշտպանական «ADEX» ցուցահանդեսին։

Սերբ պաշտոնյան իր հերթին գոհունակություն է հայտնել Ադրբեջան կատարած պաշտոնական այցի կապակցությամբ։ Նա ընդգծել է, որ Ադրբեջանը և Սերբիան պատրաստ են համագործակցության բոլոր ոլորտներում։

Սերբիայի պաշտպանության նախարարը նաև շնորհավորել է ադրբեջանցի գործընկերոջը Արցախում իրականացրած ռազմական ագրեսիայի ու էթնիկ զտման կապակցությամբ։

Նշվում է, որ հանդիպմանը մտքերի հանգամանալից փոխանակում է տեղի ունեցել ռազմական, ռազմատեխնիկական և ռազմական կրթության, տարածաշրջանային անվտանգության ոլորտում հարաբերությունների ներկա վիճակի և զարգացման հեռանկարների շուրջ, ինչպես նաև քննարկվել են փոխադարձ հետաքրքրություն ներկայացնող մի շարք այլ հարցեր։

Հավելենք, որ երկու երկրներն ակտիվ համագործակցում են ռազմական ոլորտում։ Ըստ շրջանառվող լուրերի՝ Սերբիան Ադրբեջանի հետ պայմանագիր է կնքելու 45 միավոր 155 մմ-ոց Nora-B52 հաուբիցների մատակարարման վերաբերյալ՝ ընդհանուր 311 մլն եվրո արժեքով։

Սերբիայի նախագահ Ալեքսանդր Վուչիչը նոյեմբերի վերջին տեղեկացրել էր, որ ավելի վաղ իր հայտարարած պաշտպանական խոշոր պայմանագիրն արդեն ստորագրված է, սակայն դեռևս մանրամասներ չի կարող հայտնել՝ բացառությամբ, որ այն աֆրիկյան երկիր չէ, և որ խոսքը 311 միլիոն եվրոյի մասին է (ավելի վաղ տեղեկություններ էին տարածվել, որ Սերբիան նման պայմանագիր է կնքելու Ալժիրի հետ)։ Մինչ այդ, սեպտեմբերին էլ Սերբիայի նախագահը հայտարարել էր, որ Ադրբեջանի հետ 300 մլն արժողությամբ մեծ պայմանագիր է ստորագրվելու։

2023 թվականի դեկտեմբերին Սերբիա կատարած այցի ընթացքում Ադրբեջանի նախագահ Իլհամ Ալիևը Վուչիչի հետ դիտարկել էր սերբական ռազմական տեխնիկան ու սարքավորումները։