07.10.2026 | 15:00
Հայտարարվել են քիմիայի ոլորտում Նոբելյան մրցանակի դափնեկիրները
Ադրբեջանն ու Ղազախստանը ռազմական ոլորտում համագործակցության միջկառավարական համաձայնագիր են ստորագրել
Քաղաքականություն
07.06.2024 | 23:18
Ղազախստանի պաշտպանության նախարար, գեներալ-գնդապետ Ռուսլան Ժակսիլիկովը Բաքվում Ադրբեջանի ՊՆ ղեկավար Զաքիր Հասանովի հետ հանդիպմանը նշել է, որ երկու երկրների միջև երկկողմ ռազմական համագործակցությունը հիմնված է բարեկամական և եղբայրական հարաբերությունների վրա, կարևորել համագործակցության զարգացումը ռազմատեխնիկական, ռազմական կրթության և այլ ոլորտներում, հաղորդում են ադրբեջանական լրատվամիջոցները։
Նշելով նման այցելությունների և ռազմական համագործակցության առանձնահատուկ նշանակությունը, որը նպաստում է երկու երկրների բանակների հետագա ամրապնդմանը, Ղազախստանի պաշտպանության նախարարը Հասանովին հրավիրել է «Բարձրաստիճան դիտորդի օրվա» միջոցառումներին այս տարվա հուլիսին Ակտաու քաղաքում անցկացվող «Բիրլեստիկ-2024» օպերատիվ-մարտավարական հրամանատարաշտաբային զորավարժությունների շրջանակում։
Հանդիպմանը հատուկ ընդգծվել է նաև երկու երկրների զինվորականների մասնագիտական մակարդակի հետագա բարձրացման նպատակով համատեղ վարժանքների անցկացման կարևորությունը։
Բանակցություններին մասնակցել է նաև Ադրբեջանում Ղազախստանի արտակարգ և լիազոր դեսպան Ալիմ Բայելը, մտքեր են փոխանակվել երկկողմ հետաքրքրություն ներկայացնող մի շարք հարցերի շուրջ։
Հանդիպման ավարտին Ադրբեջանի և Ղազախստանի կառավարությունների միջև ռազմական ոլորտում համագործակցության մասին համաձայնագիր է ստորագրվել։
