09.09.2026 | 20:19
«Առգրավումներն իրականացվել են կամայականորեն՝ շոուի նպատակով». Գագիկ Խաչատրյանի պաշտպանական կողմը՝ ՔԿ-ի գործողությունների մասին
Ֆրանսիայում ահաբեկչություն նախապատրաստելու կասկածանքով ՌԴ և Ուկրաինայի երկքաղաքացի է ձերբակալվել
06.06.2024 | 14:18
Ֆրանսիայում ահաբեկչություն նախապատրաստելու կասկածանքով Ռուսաստանի և Ուկրաինայի երկքաղաքացիություն ունեցող Դոնբասից տղամարդ է ձերբակալվել։ Այս մասին գրում է Current time-ը՝ վկայակոչելով Le Figaro-ն։
Երկրի ազգային հակաահաբեկչական դատախազության տվյալներով՝ 26-ամյա երիտասարդը հունիսի 3-ին, ենթադրաբար, հյուրանոցի իր համարում պայթուցիկ պատրաստելիս պայթել է։ Արտակարգ պատահարի հետևանքով նա լուրջ այրվածքներ է ստացել և հոսպիտալացվել։ Նշվում է, որ նա իջևանել է Փարիզի մերձակայքում՝ Ռուասի ան-Ֆրանսի մունիցիպալիտետի երկու աստղանի հյուրանոցում, որտեղ գտնվում է Փարիզ-Շառլ դը Գոլ միջազգային օդանավակայանը։
Պայթյունի պատճառով հյուրանոցը տարհանվել է։ Տղամարդու սենյակում խուզարկության ժամանակ հայտնաբերվել են պայթուցիկ սարքեր պատրաստելու բաղադրիչներ, գումար, մի քանի կեղծ անձնագիր և հրազեն։
Ձերբակալվածը, մինչդեռ, պնդել է, որ իր ձեռքում պայթել է բջջային հեռախոսի մարտկոցը, որը փորձում էր վերանորոգել։
Le Figaro-ի տեղեկություններով՝ կասկածյալը ծնվել է Դոնբասում, ռուսամետ դիրքորոշում ունի և երկու տարի կռվել է ռուսական բանակի կազմում Ուկրաինա լայնամասշտաբ ներխուժման ժամանակ։
«Հետաքննության նախնական եզրակացությունների համաձայն՝ կասկածյալը փորձել է մի քանի պայթուցիկ սարք պատրաստել՝ ուկրաինական բանակի համար նախատեսված ֆրանսիական ռազմական տեխնիկան ոչնչացնելու համար»,- գրում է պարբերականը։
