24.06.2026 | 12:10
Ավետիք Չալաբյանը ձերբակալվել է // Պապոյանը ԵՄ դեսպանների հետ արտահանման հարցեր է քննարկել․ ԼՈՒՐԵՐ
Ռուսաստանը կսկսի շարժական ապաստարաններ կառուցել միջուկային հարձակումից պաշտպանվելու համար
Քաղաքականություն
31.05.2024 | 23:00
Ռուսաստանը մոդուլային շարժական ապաստարաններ կտեղակայի՝ բնակչությանը միջուկային հնարավոր հարվածի հետևանքներից պաշտպանելու համար, գրում է The Moscow Times-ը։
Կառավարության որոշման նախագծի հիմնավորման մեջ նշվում է, որ քաղաքացիական պաշտպանության առկա կառույցները բավարար չեն ողջ բնակչությանը պատսպարելու համար։ Ստորգետնյա բազմաթիվ կառույցներ անմխիթար վիճակում են և տեխնիկապես անհնար է վերականգնել։
Ուստի՝ մոդուլային կառուցվածքներով ապաստարանների կառուցումը պետք է դառնա քաղաքացիների պաշտպանության նոր միջոց։
«Ներկայումս այս մեթոդը կարող է օգտագործվել բլոկ-մոդուլային տիպի քաղաքացիական պաշտպանության կառույցներ ստեղծելու համար, որոնք ունեն մի շարք առավելություններ կապիտալ կառույցների նկատմամբ, օրինակ՝ շարժունակության առումով (հնարավոր է փոխել տեղակայման վայրը), սահմանափակ տարածքում տեղաբաշխման մի շարք մեթոդներ»,- ասվում է հիմնավորման մեջ։
Մինչ այս Քաղաքացիական պաշտպանության և արտակարգ իրավիճակների համառուսաստանյան գիտահետազոտական ինստիտուտի (VNII GOChS) գիտնականները հայտարարեցին КУБ-М մոդելի տիպի շարժական ապաստարանի մշակման մասին, որը մարդկանց կարող է պաշտպանել ոչ միայն միջուկային պայթյունի պահին ճառագայթումից, այլև տարածքի ռադիոակտիվ աղտոտվածությունից:
«КУБ-М»-ը ներառում է երկու մոդուլ՝ 54 մարդու համար նախատեսված սենյակ և տեխնիկական բլոկ:
