Քաղաքականություն
28.05.2024 | 22:57
Ռուսական բիզնեսը նոր դժվարությունների է բախվել Ղազախստանում, որն օգտագործում էր որպես տարանցիկ «հանգույց» Չինաստանին վճարումների և չինական ապրանքների ներմուծման համար։ Ղազախական մի քանի բանկեր դադարեցրել են Ռուսաստանի Դաշնությունից Չինաստան գումարի փոխանցումը, The Moscow Times-ին հայտնել է ավտոպահեստամասեր ներկրող ընկերություններից մեկի ներկայացուցիչը։
Նրա խոսքով՝ բանկիրները որպես պատճառ նշում են այն, որ Չինաստանի խոշորագույն բանկը պարբերաբար «հետ է վերադարձնում» ղազախական վճարումները պատժամիջոցների տակ գտնվող ապրանքների համար։
Ղազախստանը դարձել է Ռուսաստանի Դաշնություն ապրանքների ներմուծման հիմնական հանգույցն այն բանից հետո, երբ արևմտյան ընկերությունները լքել են ռուսական շուկան, իսկ բանկային պատժամիջոցները սահմանափակել են համաշխարհային խոշոր արժույթներով վճարումներ կատարելու հնարավորությունը:
Սակայն անցած տարվա ապրիլին Ղազախստանի իշխանությունները խստացրել էին հսկողությունը ԵՏՄ սահմանով ապրանքների տեղաշարժի նկատմամբ, իսկ հոկտեմբերին՝ արգելել Ռուսաստան 106 տեսակի ապրանքների արտահանումը։
