Պուտինը հայտարարել է, թե Ուկրաինայում «միակ օրինական իշխանությունը խորհրդարանն ու Ռադայի նախագահն են»

ՌԴ նախագահ Վլադիմիր Պուտինը հայտարարել է, թե «նախնական գնահատականով՝ Ուկրաինայի միակ օրինական իշխանությունը մնում են խորհրդարանը և Գերագույն ռադայի նախագահը»։ Այս մասին նա ասել է Տաշքենդ կատարած այցին հաջորդած լրագրողների հետ ճեպազրույցում, գրում է Meduza-ն։

Նա ասել է, որ Ուկրաինայի Սահմանադրությունը նախատեսում է լիազորությունների երկարաձգում, սակայն միայն Գերագույն Ռադայի, երկրի ղեկավարի լիազորությունների երկարաձգման մասին ոչինչ չկա։

««Ռազմական դրության մասին» ուկրաինական օրենքն ասում է, որ նախագահական ընտրություններ չեն անցկացվում ռազմական դրության ժամանակ։ Բայց դա չի նշանակում, որ լիազորությունները երկարացվում են։ Ընտրություններ չեն անցկացվում։ Ո՞վ է ասում՝ դրանք պետք է երկարացվեն։ Այդ մասին Սահմանադրության մեջ ոչինչ չկա։ Բայց կա Սահմանադրության 111-րդ հոդված, որտեղ ասվում է, որ այս դեպքում բարձրագույն իշխանության՝ փաստացի նախագահի լիազորությունները փոխանցվում են խորհրդարանի նախագահին։ Ավելին, ռազմական դրության պայմաններում խորհրդարանի լիազորություններն ընդլայնվում են։ Սա նախնական վերլուծությունն է։ Նախնական գնահատմամբ՝ միակ լեգիտիմ կառավարությունը մնում է խորհրդարանը և Ռադայի նախագահը»,- ասել է Պուտինը։

Մայիսի 24-ին էլ Մինսկում մամուլի ասուլիսի ժամանակ Պուտինը հայտարարել էր, որ Ուկրաինայի նախագահ Վլադիմիր Զելենսկիի լեգիտիմությունն «ավարտվել է»։

Նա նաև հավելել էր, թե Ռուսաստանը չի հրաժարվել բանակցություններից, սակայն նախքան իրավաբանորեն պարտադիր փաստաթղթեր ստորագրելը՝ Մոսկվան պետք է հասկանա, թե «ում հետ կարող է և պետք է գործ ունենա»։