29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Թուրքիայում 4 բարձրաստիճան ոստիկաններ են ձերբակալվել հեղաշրջման փորձի գործով
Քաղաքականություն
16.05.2024 | 16:50
Անկարայում ձերբակալվել են չորս բարձրաստիճան ոստիկաններ՝ կապված կազմակերպված հանցավորության դեմ պայքարի բաժնի ղեկավար Այհան Բորա Կապլանի հետաքննության հետ, որի ցանցը, ենթադրաբար, կապեր է ունեցել ներքին գործերի նախկին նախարար Սուլեյման Սոյլուի և այլ բարձրաստիճան պաշտոնյաների հետ, գրում են թուրքական լրատվամիջոցները։
Անկարայի Գերագույն քրեական դատարանում շարունակվում է 61 մեղադրյալի դատավարությունը՝ Կապլանի հանցավոր խմբի դեմ հետաքննության շրջանակներում։
Անցյալ շաբաթ ՆԳՆ-ն պաշտոնանկ էր արել Անկարայի փոխոստիկանապետ Մուրադ Չելիքին, ինչպես նաև երեք այլ ոստիկանական պաշտոնյաների՝ Քերեմ Գյոքայ Օներին, Շևքեթ Դեմիրջանին և Ուֆուկ Գյուլթեքինին, որոնք, ենթադրվում է, ղեկավարում էին Այհան Բորա Կապլանի օպերացիան։ Հենց այս երեքն են ձերբակալել Կապլանին 2023 թվականի սեպտեմբերի 7-ին։
Նախաքննության շրջանակում խուզարկվել են ոստիկանների բնակարանները, առգրավվել թվային որոշ նյութեր։ Երեք ոստիկանների նախնական ձերբակալությունից հետո մայիսի 15-ին բերման է ենթարկվել նաև Գյուլթեքինը։
Սերդար Սերթչելիքը, որը նույն հետաքննության ընթացքում մեղադրվում էր հանցավոր սինդիկատի գործադիր տնօրեն լինելու և արտերկիր փախչելու մեջ, լրագրող Էրք Աջարերին ասել է, որ ինքը հետաքննության գաղտնի վկա է եղել։ Նա նաև ասել է, որ իրեն օգնել են փախչել Անկարայի անվտանգության վարչության ոստիկաններ։ Սերթչելիքը պնդել է, որ իր վրա ճնշում են գործադրել իշխող «Արդարություն և զարգացում» կուսակցության մի քանի առանցքային դեմքերի, այդ թվում՝ նախագահ Ռեջեփ Թայիփ Էրդողանի նախարարներին և մերձավորներին ներգրավելու համար։ Նա նշել է, թե Անկարայի ոստիկանության աշխատակիցները ստիպել են իրեն կեղծ հայտարարություններ անել՝ որպես ԱԶԿ-ն վարկաբեկելու դավադրության մաս:
Սերթչելիքի պնդմամբ՝ Անկարայի անվտանգության վարչությունը «Արդարություն և զարգացում» կուսակցության դեմ հեղաշրջման փորձ է իրականացրել։
Թուրքական լրատվամիջոցները նախօրեին հայտնել էին, որ Թուրքիայի նախագահ Էրդողանը նախագահականում շտապ խորհրդակցություն է հրավիրել Ազգային հետախուզական ծառայության (MİT) ղեկավար Իբրահիմ Քալընի և արդարադատության նախարար Յըլմազ Թունչի մասնակցությամբ։ Կեսգիշերին տեղի ունեցած խորհրդակցության օրակարգն Անկարայի ոստիկանությունից հեռացված ոստիկանապետերի նկատմամբ հետաքննությունն է եղել՝ հնարավոր հեղաշրջման փորձի հետ կապված։
