ԱՄՆ պետքարտուղարի օգնականը հայտարարել է Վրաստանի նկատմամբ պատժամիջոցների մասին, եթե «օտարերկրյա գործակալների մասին» օրենքը հաստատվի ներկա տեսքով

ԱՄՆ պետքարտուղարի Եվրոպայի ու Եվրասիայի հարցերով օգնական Ջեյմս Օ՛Բրայենը Թբիլիսիում ճեպազրույցի ժամանակ ներկայացրել է Վրաստան կատարած այցի արդյունքներն ու հանդիպումները իշխանությունների, քաղաքացիական հասարակության և ընդդիմության ներկայացուցիչների հետ։

Նա, մասնավորապես, անդրադարձել է «օտարերկրյա գործակալների մասին» օրենքին՝ խոսելով այն լրամշակելու հնարավորության և ընդգծելով ներկայիս տեսքով դրա ընդունման հետևանքների մասին։ ԱՄՆ պաշտոնյան նշել է, որ ժամանել է Վրաստան, քանի որ Վաշինգտոնը «խորապես գնահատում է Վրաստանի հետ հարաբերությունները, որոնք դիտարկում է որպես ռազմավարական գործընկերություն՝ ասելով, որ «վերջին ելույթներից մի քանիսը և [Վրաստանի] խորհրդարանի գործողությունները ստիպել են  կասկածի տակ դնել՝ արդյո՞ք վրացական իշխանությունները կիսում են երկու երկրների ռազմավարական շահերը»:

Ըստ Օ՛Բրայենի՝ երբ ժամանել է Վրաստան, «մի փոքր անհանգստացել է՝ այստեղ երկու բոլորովին տարբեր նարատիվների հանդիպելով»։ Դրանցից մեկը, նրա խոսքով, վերաբերում է «օտարերկրյա գործակալների մասին» օրենքին, իսկ մյուսն իշխող ուժի հռետորաբանությունն է «գլոբալ պատերազմի կուսակցության» մասին, և որ կա «Արևմտյան դավադրություն նրանց իշխանությունից հեռացնելու հետ կապված»՝ դա անվանելով «անիրատեսական, սխալ և թյուրիմացություն»:

Օ՛Բրայենն ընդգծել է, որ ԱՄՆ դիրքորոշումն այն է, որ «ցույցերը լինեն խաղաղ», ցուցարարների կամ այլոց նկատմամբ չլինեն ահաբեկումներ՝ վկայակոչելով վերջին շաբաթների ընթացքում տեղի ունեցած ոստիկանական բռնությունների մասին հաղորդումները։ Նա նաև ընդգծել է, որ դրա համար «պատասխանատու անձինք պետք է պատասխանատվության ենթարկվեն»։

Ըստ նրա՝ «եթե օրենքն ընդունվի առանց ԵՄ նորմերի պահպանման», իսկ ԱՄՆ-ի և մյուս գործընկերների դեմ հռետորաբանությունը շարունակվի, ԱՄՆ-ի հետ հարաբերությունները «վտանգված կլինեն»։ Ամերիկացի պաշտոնյան ընդգծել է, որ եթե ԱՄՆ-ն այժմ դիտարկվի որպես «հակառակորդ, ոչ թե գործընկեր», 390 միլիոն դոլարի օգնության փաթեթը, որը ներառում է պաշտպանական, տնտեսական և զարգացման ծրագրեր, «ստիպված կլինեն վերանայել»:

Պետքարտուղարի օգնականը խոսել է նաև սահմանափակումների կիրառման մասին՝ շեշտելով, որ եթե «օրենքն ուժի մեջ մտնի ԵՄ նորմերին հակասությամբ և խաթարի ժողովրդավարությունը, բռնություն լինի խաղաղ ցուցարարների նկատմամբ, ապա ականատես կլինեն ԱՄՆ-ի սահմանափակումներին՝ ֆինանսական և ճանապարհորդության սահմանափակումներ պատասխանատուների և նրանց ընտանիքների նկատմամբ»:

Ջեյմս Օ՛Բրայենը հույս է հայտնել, որ Վրաստանը «նախկինի պես կշարունակի իր ճանապարհը դեպի ԵՄ ու ՆԱՏՕ»։