Միջազգային կազմակերպությունները Բրիտանիայի ԱԳ նախարարին կոչ են արել միջոցներ ձեռնարկել՝ ադրբեջանցի ընդդիմադիր գործչին ազատ արձակելու համար

Մեծ Բրիտանիայում գործող 50 միջազգային կազմակերպություններ, Օքսֆորդի, Քեմբրիջի, Էքսեթերի, Սասեքսի, Նոթինգհեմի, Լանքաստերի, Նյու Քասլի, Դուբլինի համալսարանների դասախոսներ ստորագրահավաք են անցկացրել՝ Մեծ Բրիտանիայի արտաքին գործերի նախարար Դեյվիդ Քեմերոնին կոչ անելով միջոցներ ձեռնարկել ավելացնել ջանքերը ադրբեջանցի հայտնի տնտեսագետ, Լոնդոնի տնտեսագիտության դպրոցի ավագ գիտաշխատող Գուբադ Իբադօղլուի ազատ արձակման համար։

Ադրբեջանական լրատվամիջոցների հաղորդմամբ՝ նամակում նշվում է, որ 2024 թվականի ապրիլի 22-ին կալանքից տնային կալանքի տեղափոխված Գուբադ Իբադօղլուի առողջական վիճակը լրջորեն վատացել է ձերբակալությունից հետո։

«Նա վիրահատության կարիք կունենա, բայց դեռևս արգելքի տակ է։ Որպես արտաքին գործերի նախարար՝ մենք ձեզ կոչ ենք անում հնարավորինս շուտ հանդիպել Իբադօղլուի ընտանիքին՝ նրա գործն ավելի մանրամասն քննարկելու, գնահատելու, թե ինչպես կարող է Մեծ Բրիտանիան լավագույնս աջակցել նրան՝ ապահովելու նրա անհապաղ ազատումը և անկախ բժշկական օգնության հասանելիությունը: Մենք կոչ ենք անում ձեզ դիտարկել բոլոր համապատասխան միջոցները՝ Ադրբեջանում բարձրաստիճան պետական ​​պաշտոնյաների հաշվետվողականությունը բարձրացնելու համար։ Կոչ ենք անում Մեծ Բրիտանիային և նրա դաշնակիցներին՝ Բաքվում կայանալիք COP 29-ը դիտարկել որպես ուղղակի ներգրավվածության ռազմավարական հնարավորություն և ակտիվացնել ջանքերը մարդու իրավունքների, կոռուպցիայի դեմ պայքարի և քաղաքական ընդդիմության հետ գործ ունենալու ուղղությամբ»,- ասվում է նամակում։

Նշենք, որ ապրիլի 22-ին Ադրբեջանի իշխանությունները, տեղի տալով միջազգային ճնշումներին, ընդդադիր գործիչ, հայտնի տնտեսագետ Գուբադ Իբադօղլուի բանտարկությունը փոխարինել էին տնային կալանքով։ Գուբադ Իբադօղլուն կալանավորվել է 2023 թվականի հուլիսի 23-ին՝ կեղծ փողեր պատրաստելու (Քրեական օրենսգրքի 204.3.1 հոդված) և կրոնական ծայրահեղական բնույթի նյութեր տարածելու մեղադրանքով (քրեական օրենսգրքի 167-3.1 հոդված)։ Այս մեղադրանքներով նրան սպառնում է մինչև 17 տարվա ազատազրկում։

2023 թվականի հուլիսի 24-ին Բաքվի Նարիմանովի շրջանային դատարանն ընդդիմադիր գործչի նկատմամբ խափանման միջոց է ընտրել 3 ամիս 26 օր ժամկետով կալանքը։ Փետրվարի 15-ին նրա կալանքը երկարացվել է ևս երեք ամսով։ Իբադօղլուն չի ընդունում առաջադրված մեղադրանքները՝ նշելով, որ իրեն բանտարկել են քաղաքական պատվերով։ Տեղական և միջազգային իրավապաշտպան կազմակերպությունները, ինչպես նաև ԱՄՆ Պետքարտուղարությունն ու մի շարք կոնգրեսականներ Գուբադ Իբադօղլուին համարում են քաղբանտարկյալ։

Իբադօղլուն, բացի քաղաքական գործունեությունից, հայտնի է նաև որպես տնտեսագետ, դասավանդում է արտասահմանյան մի շարք բուհերում։ Սոցցանցերի էջերում նա պարբերաբար սուր քննադատության էր ենթարկում Իլհամ Ալիևին՝ տնտեսության վատ կառավարման, երկրում կոռուպցիայի, մարդու իրավունքների վատթար վիճակի համար։

Էմմա Չոբանյան