01.05.2026 | 23:26
Հարյուր հազարավոր մարդիկ Գերմանիայում մայիսմեկյան ցույցերի են դուրս եկել
Մենք դեռևս չենք լսել հակափաստարկներ առաջարկվող օրենսդրության դեմ. Կոբախիձեն՝ Միշելի հետ զրույցի մասին
Քաղաքականություն
04.05.2024 | 18:45
Վրաստանի վարչապետ Իրակլի Կոբախիձեն X-ում արված գրառմամբ անդրադարձել է ԵԽ նախագահ Շառլ Միշելի հետ հեռախոսազրույցին։
«Եվրոպական խորհրդարանի նախագահ Միշելի հետ զրուցել եմ «Օտարերկրյա ազդեցության թափանցիկության» և «Ընտանեկան արժեքների և անչափահասների պաշտպանության» մասին օրինագծերի մասին։ Իմ հիասթափությունն եմ հայտնել, որ չնայած բազմաթիվ հրավերներին՝ մեր գործընկերները խուսափել են մասնակցել թափանցիկության մասին օրենքի վերաբերյալ առարկայական քննարկումներին։ Ավելին, ընդգծել եմ, որ մենք դեռևս չենք լսել հակափաստարկներ առաջարկվող օրենսդրության դեմ, որն ուղղված է բացառապես վրացական հասարակության առջև համապատասխան կազմակերպությունների թափանցիկության և հաշվետվողականության բարձրացմանը։
Ես Եվրոպական խորհրդի նախագահի ուշադրությանն եմ ներկայացրել օտարերկրյա ֆինանսավորվող կազմակերպությունների ակտիվ ներգրավվածությունը 2020-ից 2023 թվականներին Վրաստանում տեղի ունեցած երկու հեղափոխությունների փորձերին։
Այս համատեքստում ես ընդգծել եմ, որ թափանցիկության մասին օրենքի ընդունումը վճռորոշ նախապայման է ապաբևեռացման հասնելու համար, ինչը Եվրոպական միության գլխավոր հանձնարարականն է»,- X-ի իր միկրոբլոգում գրել է Կոբախիձեն:
Հիշեցնենք, որ Միշելը Կոբախիձեի հետ տեղի ունեցած հեռախոսազրույցի մասին գրառում էր արել ու նշել, որ Վրաստանի ապագան Եվրամիության հետ է ու կոչ էր արել բաց չթողնել պատմական այդ հնարավորությունը։
