Մամուլի ազատության համաշխարհային օրվա կապակցությամբ Բաքվում Մեծ Բրիտանիայի դեսպանն անդրադարձել է Ադրբեջանում ԶԼՄ-ների սահմանափակումներին։
«Մամուլի ազատության համաշխարհային օրը Մեծ Բրիտանիան վերահաստատում է իր հանձնառությունը՝ պաշտպանելու ԶԼՄ-ների ազատությունն ամբողջ աշխարհում։ Մեծ Բրիտանիան ևս հանդես է գալիս Ադրբեջանում անկախ լրատվամիջոցների սահմանափակումների դեմ։ Ազատ մամուլն անհրաժեշտ պայման է ժողովրդավարական, կայուն և բարգավաճ հասարակության համար»,- գրել է Ֆերգյուս Օլդը X-ի իր միկրոբլոգում։
Ադրբեջանի ԱԳՆ մամուլի խոսնակ Այխան Հաջիզադեն քննադատել է դեսպանին։
«Պարո՛ն դեսպան, ձեր հայտարարությունը զուրկ է արդարությունից և անաչառությունից, քանի որ դուք կենտրոնանում եք նեղ հեռանկարի վրա՝ բաց թողնելով Ադրբեջանում լրատվամիջոցների ազատության համապարփակ իրավիճակը։ Ադրբեջանում լրատվամիջոցները նույնքան ազատ են, ժողովրդավարական, կայուն և բարգավաճ, որքան Մեծ Բրիտանիայում»,- նշել է Հաջիզադեն։
Հավելենք, որ «Լրագրողներ առանց սահմանների» կազմակերպության հրապարակած 2024 թվականի Մամուլի ազատության համաշխարհային զեկույցում Ադրբեջանը 180 երկրների շարքում զբաղեցնում է 164-րդ հորիզոնականը։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ, ընդդիմադիր գործիչներ ու քաղաքական ակտիվիստներ։ Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։ Միջազգային կառույցները կոչ են անում Ադրբեջանի իշխանություններին՝ դադարեցնել բռնաճնշումներն ու բոլորին ազատ արձակել։ Ապրիլի 25-ին էլ Եվրախոհրդարանը բանաձև էր ընդունել՝ կոչ անելով Ադրբեջանի իշխանություններին ազատ արձակել բոլոր քաղբանտարկյալներին։
Էմմա Չոբանյան
