Թուրքերը հանգստյան օրերին բոյկոտ են հայտարարելու սրճարաններին ու ռեստորաններին՝ բարձր գների պատճառով

Մի խումբ թուրքեր, որոնք դժգոհում են սրճարաններում և ռեստորաններում սննդի և խմիչքի բարձր գներից ու տնտեսական անկման պայմաններում գործարարներին մեղադրում են պատեհապաշտության մեջ, որոշել են հանգստայան օրերին բոյկոտ կազմակերպել, գրում են թուրքական լրատվամիջոցները։

Բոյկոտը, որի կոչ սոցիալական ցանցերում արել են քաղաքացիները՝ նշելով, որ այլևս չեն կարող իրենց թույլ տալ ուտել դրսում բարձր գնաճի և ֆինանսական դժվարությունների պատճառով, աջակցություն է ստացել նաև որոշ հասարակական գործիչների կողմից: Բոյկոտի կազմակերպիչներն ու կողմնակիցներն ասում են, որ բիզնեսներն օգտագործում են Թուրքիայի գնաճային միջավայրը որպես պատրվակ՝ իրենց շահույթն ավելացնելու համար:

Սոցիալական ցանցերում տարածվում է #fahisyemeğeBOYKOT (բոյկոտել թանկ սնունդը) հեշթեգը։ Ակցիային միացել են տնտեսության հարցերով փորձագետ Իրիս Ջիբրեն և լրագրողներ Ջենգիզ Էրդինչն ու Սևիլայ Յըլմանը։

Ջիբրեն բոլորին հրավիրել է միանալ բոյկոտին՝ «վերջ դնելու պատեհապաշտությանը»:

«Հավի դոների կես բաժինը չի կարող արժենալ 200 լիրա։ Սա գնաճ չէ, շահամոլություն է»,- ասել Էրդինչը։

Յըլմանն էլ կոչ է արել մարդկանց ապրիլի 20-21-ը չգնալ սրճարաններ և ռեստորաններ, եթե նույնիսկ հրավիրված են, նշելով, որ անհրաժեշտ է ցույց տալ ժողովրդի ուժը խանութպանների դեմ, որոնք «գնաճը որպես պատրվակ են օգտագործում»։

Նշենք, որ Թուրքիայում սպառողական գների աճի տեմպերը մարտին կրկին արագացել են՝ հասնելով 2022 թվականի նոյեմբերից ի վեր նոր առավելագույնին՝ ըստ երկրի վիճակագրական ծառայության։ Մարտին գնաճը տարեկան կտրվածքով կազմել է 68,5 տոկոս։ Սակայն ENAG-ը (անկախ տնտեսագետների խումբ) հայտարարում է, որ իրենց սեփական հաշվարկներով՝ գնաճի տարեկան ցուցանիշը կազմել է գրեթե 125 տոկոս:

Էմմա Չոբանյան