Այն ուժ էր տարածաշրջանում Ֆրանսիայի և ԱՄՆ-ի ներկայության դեմ, ոչ թե Ադրբեջանի․ Մեջլիսի պատգամավորները՝ ռուս խաղաղապահների մասին

Ադրբեջանի Միլլի Մեջլիսի պատգամավորներն այսօրվա նիստում անդրադարձել են Արցախից ռուս խաղաղապահների վաղաժամ դուրսբերմանը՝ գովեստի խոսքեր հնչեցնելով ռուսական կողմի հասցեին և շարունակելով պաշտոնական Բաքվի հակարևմտյան քարոզչական գիծը։

Պատգամավոր Ջեյհուն Մամեդովը հայտարարել է, թե ադրբեջանա-ռուսական հարաբերությունների ու երկու երկրների ղեկավարների միջև բարձր մակարդակի հարաբերությունների ցուցանիշ է ռուս խաղաղապահների դուրսբերումը, և նրանց հեռանալուց հետո երկկողմանի բարեկամական հարաբերություններ կդառնան ավելի ուժեղ:

«Միաժամանակ, Միացյալ Նահանգների արձագանքը Ղարաբաղից ռուս խաղաղապահների դուրսբերմանը խորը ափսոսանք է առաջացնում։ Մեկնաբանելով այս հարցը՝ Պետքարտուղարության ներկայացուցիչը հայտարարել է, որ Ռուսաստանը «անվստահելի դաշնակից է», չի ողջունում խաղաղապահների դուրսբերումը Ղարաբաղից, այն մեկնաբանել է բացասաբար՝ մատնանշելով ԱՄՆ-ի կեղծավորությունը։ Սա ևս մեկ անգամ ցույց է տալիս, որ ԱՄՆ-ն և Ֆրանսիան հակամարտությունների կարգավորման ամենամեծ հակառակորդներն են, նրանք չեն ցանկանում, որ հակամարտությունն ավարտվի։ Մինչ այժմ ԱՄՆ-ը, որը փորձում էր ճնշել Ռուսաստանին աշխարհի բոլոր տարածաշրջաններից, Ղարաբաղի խաղաղապահների նկատմամբ իր մոտեցման այլ դիրքորոշում է բացահայտում»,- ասել է պատգամավորը։

Մեջլիսի մարդու իրավունքների հարցերի հանձնաժողովի նախագահ Զահիդ Օրուջն էլ ասել է, թե ռուս խաղաղապահների դուրսբերման վերաբերյալ երկու պետությունների ղեկավարների համաձայնությունը կարևոր միջազգային անվտանգության, ռազմական և քաղաքական իրադարձություն է։

Նա ասել է, թե հրապարակումները, որ ռուսական խաղաղապահները վնասել են Ադրբեջանին և «հայկական օկուպացիան փոխարինվել է ռուսական բանակով», հեյրուրանք էին, որպեսզի արատավորեին Ադրբեջանի հաղթանակը»։ Ըստ ադրբեջանցի պատգամավորի՝ Ուկրաինայի հետ պատերազմից հետո ՆԱՏՕ-ի երկրները ցանկանում էին բախում առաջացնել ադրբեջանցի և ռուս զինվորների միջև։

«Դա մեր անկախությունը կաշկանդող օտար երկրի ռազմաբազա չէր, ընդհակառակը, այն ուժ էր տարածաշրջանում Ֆրանսիայի և Ամերիկայի ներկայության դեմ։ Սպիտակ տանը և Ելիսեյան պալատում հիասթափված են, որ ռուսական ռազմական ուժերը չվերափոխվեցին 366-րդ գնդի, և որ խաղաղ, առանց արյունահեղության լքեցին։ Ադրբեջանը հերթական հաղթանակը տարավ ՆԱՏՕ-ի նկատմամբ։ Հիմա պատմության մեջ առաջին անգամ հայերի համար իրենց կյանքը տված 1960 ռուս զինվորները պատրաստվում են կռվել ոչ թե ադրբեջանցիների, այլ Արևմուտքի դեմ»,- ասել է Օրուջը։

Ապրիլի 16-ի երեկոյան ադրբեջանական լրատվամիջոցները հայտնել էին, որ հայկական Դադիվանք վանական համալիրի պաշտպանությունը ռուս խաղաղապահները փոխանցել են ադրբեջանական ոստիկանությանը։ Դրանից հետո սկսեցին տարածվել ռուս խաղաղապահների տեխնիկայի շարասյուների տեղաշարժի տեսանյութեր։ Ավելի ուշ պաշտոնական Բաքուն ու Մոսկվան հաստատեցին, որ սկսվել է Արցախից ռուս խաղաղապահների վաղաժամ դուրսբերման գործընթաց։

Էմմա Չոբանյան