Վճռաբեկ դատարանում մեկնարկեց ՄԻԵԴ-ում ՀՀ-ի կողմից առաջադրվող դատավորի թեկնածուների ընտրության հարցազրույցի փուլը

Վճռաբեկ դատարանում քիչ առաջ մեկնարկեց Մարդու իրավունքների եվրոպական դատարանում Հայաստանի կողմից առաջադրվող դատավորի թեկնածուների ընտրության հարցազրույցների փուլը։

ՄԻԵԴ դատավորի թեկնածուների ընտրության մրցույթ հայտարարելու անհրաժեշտություն է առաջացել, քանի որ այս տարի լրանում է ՄԻԵԴ-ում Հայաստանի դատավոր Արմեն Հարությունյանի պաշտոնավարման ժամկետը, և նրան պետք է փոխարինել նոր դատավորով։

Այսօրվա ընտրությամբ, սակայն, ՄԻԵԴ դատավորը ընտրված չի համարվի, քանի որ մեկ փուլ էլ նախատեսվում է Եվրոպայի խորհրդի խորհրդարանական վեհաժողովում։ Այսօրվա մրցույթի արդյունքում երեք թեկնածու է ընտրվելու:

Նշենք, որ Հայաստանում ևս թեկնածուների ընտրության համար երկու փուլ է նախատեսված եղել․ առաջին փուլը հաղթահարել ու հարցազրույցի փուլ են անցել ՍԴ փոխնախագահ Վահե Գրիգորյանը, փաստաբան Հայկ Ալումյանը, ԲԴԽ անդամ Վիգեն Քոչարյանը, իրավաբանական գիտությունների թեկնածու, դոցենտ Աննա Մարգարյանը, դատավորներ Նորա Կարապետյանը, Լիզա Գրիգորյանը, սահմանադրական իրավունքի մասնագետ Արմեն Մազմանյանը։

Հարցազրույցներն անցկացվելու են այսօր՝ սկսած ժամը 14։00-ից և շարունակվեն վաղը՝ ժամը 10։00-ից։

Վարչապետի որոշման համաձայն՝ ՄԻԵԴ դատավորի պաշտոնում ՀՀ-ի կողմից առաջադրվող թեկնածուների ընտրության հանձնաժողովի անդամներն են․
1) Հայաստանի Հանրապետության սահմանադրական դատարանի նախագահը (համաձայնությամբ).
2) Հայաստանի Հանրապետության բարձրագույն դատական խորհրդի նախագահը (համաձայնությամբ).
3) Հայաստանի Հանրապետության արտաքին գործերի նախարարը.
4) Հայաստանի Հանրապետության արդարադատության նախարարը.
5) Հայաստանի Հանրապետության Ազգային ժողովի մարդու իրավունքների պաշտպանության և հանրային հարցերի մշտական հանձնաժողովի նախագահը (համաձայնությամբ).
6) Հայաստանի Հանրապետության վճռաբեկ դատարանի նախագահը (համաձայնությամբ). 7) Հայաստանի Հանրապետության գլխավոր դատախազը (համաձայնությամբ).
7) Մարդու իրավունքների պաշտպանը (համաձայնությամբ).
8) Հայաստանի Հանրապետության նախագահի ներկայացուցիչը (համաձայնությամբ).
9) Հայաստանի Հանրապետության փաստաբանների պալատի նախագահը (համաձայնությամբ).
10) «Հելսինկյան քաղաքացիական ասամբլեայի Վանաձորի գրասենյակ» հասարակական կազմակերպության նախագահը (համաձայնությամբ):

Առաջին մասնակիցը Հայկ Ալումյանն է, նրա հարցազրույցն արդեն սկսվել է:

Արաքս Մամուլյան