26.04.2026 | 15:53
Վթարային ջրանջատում Արմավիրի և Կոտայքի մարզերում
Հայաստանն ու ԵՄ-ն համաձայնագիր կստորագրեն՝ հանցավորության դեմ պայքարում
Քաղաքականություն
04.04.2024 | 09:53
Կառավարության նիստում քննարկվելու է Հայաստանի ու ԵՄ-ի նոր համաձայնագիր ստորագրելու հարցը, որը հնարավորություն կտա Երևանին ու Բրյուսելին համագործակցել «Եվրաջասթ»-ի շրջանակներում։ «Եվրաջասթ»-ը Եվրոպական միության անդամ երկրների դատախազություններին վերապահված գործառույթները համակարգող և անդամ երկրների դատախազությունների միջև համագործակցությունը խթանող համաեվրոպական կառույց է։ Այն, ի թիվս այլ գործառույթների, իրականացնում է հավաքագրված տվյալների փոխանակում ինչպես ԵՄ անդամ, այնպես էլ երրորդ երկրների իրավասու մարմինների միջև։
Համաձայնագրի նպատակն է զարգացնել «Եվրաջասթ»-ի և ՀՀ իրավասու մարմինների միջև ծանր հանցագործությունների, կազմակերպված հանցավորության և ահաբեկչության դեմ պայքարը։ Համաձայնագրով «Եվրաջասթ»-ը կաջակցի ՀՀ-ին համատեղ քննչական խմբերի ձևավորման հարցում:
««Եվրաջասթ»-ն ունի իրավասության լայն շրջանակ անդրազգային հանցավորության դեմ պայքարում, հետևաբար՝ Համաձայնագրի կնքումը հնարավորություն կընձեռի ՀՀ քննչական մարմիններում նախաձեռնված քրեական վարույթներով ԵՄ անդամ պետությունների իրավասու մարմինների հետ իրականացնել արդյունավետ համագործակցություն, իսկ ՀՀ դատախազության ներկայացվածությունը «Եվրաջասթ»-ում կնպաստի անհրաժեշտ հաղորդակցման արագությանն ու ցուցաբերված փոխադարձ աջակցության որակին»,- նշված է Արդարադատության նախարարության հիմնավորումներում, որն էլ գործադիր մարմնին առաջարկում է հավանության արժանացնել համաձայնագրի ստորագրումը:
Ուշագրավ է, որ ՀՀ գլխավոր դատախազությունը 2021 թվականին է ստացել առաջարկությունը, սակայն միայն այս տարի է պատասխանել։
Նարեկ Կիրակոսյան
