Երիտասարդները կարող են փողոց փակել ու իշխանություն փոխել, նաև դրա համար են հեռացնում Երևանից. Արծրունի. ՏԵՍԱՆՅՈՒԹ

«Երևանի դեգրադացիան այսօր չի սկսվել, ծառերի հատումն էպիզոդ է`իրադարձությունների շղթայի մեջ: Երևանի լրջագույն խնդիրը հանրային սեփականության վերադարձն է ժողովրդին: Ծառերին կլինի, թե սահմանային գյուղերին, ես տեսնում եմ իշխանության նույն վերաբերմունքը, նրա մոտեցման նույն ալգորիթը: Այս իշխանությունը մասնագիտական հանրույթի կարծիքն ընդհանրապես հաշվի չի առնում, և նրա հանդեպ ժողովրդի վստահության քվեն զրոյական է»,- Factor TV-ի հետ զրույցում նշում է կոմպոզիտոր, երգիչ Վահան Արծրունին` անդրադառնալով Երևանի քաղաքապետարանի կողմից իրականացվող ռեֆորմին` կենսունակությունը կորցրած ծառերը հատելու և փոխարինելու հետ կապված:

Նրա կարծիքով` այս իշխանությունը հաշվի չի առնում հանրության կարծիքը, կլինի դա ծառերի հատման, թե Տավուշի գյուղերի հետ կապված. «Տավուշում մենք տեսնում ենք ամենավտանգավորը`ժողովուրդն ընդդիմանում է իշխանությանը, այնքան չի վստահում, որ պատրաստ է դեմ դուրս գալ նրա որոշումներին»:

Արծրունու կարծիքով` մեր հասարակությունն ինքնադրսևորման ձևաչափերը կորցրել է, և եթե ինքը նախկինում դա կապում էր հետպատերազմյան շոկի հետ, ապա հիմա` ոչ. «Բավական ժամանակ է անցել, և մենք տեսնում ենք անհաղորդ հասարակություն»: Կոմպոզիտորը խոսում է նաև իշխանության վերաբերմունքից` մեր մշակութային կապիտալին. «Պետությունը մշակութային օջախներին վերաբերվում է որպես գույքի, և ինքն է որոշում` դրանց մեջ ինչ է լինելու: Տպավորություն է, որ յուրաքանչյուր օջախ, որն ունի պատմություն, այս իշխանությանը պետք չէ»,-ասում է նա` անդրադառնալով Կոնսերվատորիայի շենքի շուրջ աղմուկին, որոշ ստեղծագործական միությունների շենքերի պետականացման հարցին:

Վահան Արծրունին խոսում է Ակադեմիական քաղաքի նախագծի շրջանակում մեր բուհերի`Երևանի ծայրամաս տեղափոխվելու մասին` շեշտելով, որ այդ կերպ մայրաքաղաքում փիլիսոփայություն և հայեցակարգային մոտեցում է խախտվում. «Քանդվում են ան հիմքերը, որոնց վրա կառուցվել է մայրաքաղաքի դոկտրինը: Այս իշխանությանը ձեռնտու է երիտասարդներին քաղաքից դուրս բերելը, քանի որ ինքը լավ գիտի, որ այդ ակտիվ սոցիալական խումբը վտանգավոր է, հարկ եղած դեպքում կարող է փողոց փակել ու իշխանություն բերել»:

Նրա խոսքով` ավելի օրգանիկ կլիներ, եթե մայրաքաղաքի ծայրամասում կլաստեր ստեղծվեր իշխանական կառույցների համար, և քաղաքից դուրս բերվեր, այսպես ասած, կառավարական կլաստերը`բոլոր նախարարություններով. «Տրանսպորտի խնդիր չէր լինի, կառավարական մեքենաների շարժի պատճառով առաջացող խցանումներ` ևս»:

Մանրամասները`տեսանյութում:

Աննա Բաբաջանյան