05.10.2026 | 19:48
Ոստիկանության անունից քաղաքացիներին կեղծ հաղորդագրություններ են ուղարկում. ՆԳՆ-ն զգուշացնում է
Պետդեպն արձագանքել է՝ ՀՀ-ԱՄՆ-ԵՄ հանդիպման վերաբերյալ Ադրբեջանի դժգոհություններին
Քաղաքականություն
28.03.2024 | 10:57
Պետքարտուղարության մամուլի խոսնակ Մեթյու Միլլերը ճեպազրույցում արձագանքել է պաշտոնական Բաքվի դժգոհություններին ապրիլի 5-ին Բրյուսելում կայանալիք ՀՀ-ԱՄՆ-ԵՄ եռակողմ գագաթնաժողովի կապակցությամբ։ Ճեպազրույցում պատասխանելով հարցին, թե Ադրբեջանն այն անվանում է «բաժանարար» և որ ԱՄՆ-ն և ԵՄ-ն կարող են կիսել պատասխանատվությունը այս հանդիպումից հետո հնարավոր էսկալացիայի համար,Միլլերն ասել է, որ այդ մեկնաբանությունների հետ համաձայն չեն։
«Այնպես որ, ես ակնհայտորեն չէի համաձայնի այդ մեկնաբանությունների հետ։ Այս հանդիպման առանցքը տնտեսական դիմակայունության վրա է՝ օգնելու Հայաստանին դիվերսիֆիկացնել իր առևտրային գործընկերոներին և լուծելու մարդասիրական կարիքները: Ես չեմ կարողանում հասկանալ, թե ինչու դա կարող է էսկալացիայի բերել կամ անհանգստություն առաջացնել աշխարհի որևէ երկրի համար»,-նշել է Միլլերը։
Նա նաև չի բացառել, որ Ադրբեջանի հետ կապված խնդիրները ևս կարող են քննարկվել։
«Ենթադրում եմ, որ միշտ հնարավոր է, դա կարող է հայտնվել հանդիպման լուսանցքում, բայց դա հանդիպման կիզակետը չէ: Բրյուսելում կայանալիք հանդիպումը պետք է կենտրոնանա Հայաստանի տնտեսական դիմակայունության վրա, քանի որ այն աշխատում է իր առևտրային գործընկերությունների դիվերսիֆիկացման և հումանիտար կարիքների լուծման ուղղությամբ»,-ընդծել է Միլլերը։
Դիտարկմանը, թե որքանո՞վ է այս հանդիպման պատճառը Հայաստանի՝ Ռուսաստանից հեռու մնալն ու ԵՄ ճանապարհով գնալու որոշումը, Պետդեպի խոսնակն ասել է, որ այլ մեկնաբանություն չունի, բացի այն, ինչ ասել է։
Հիշեցնենք, որ նախօրեին Ադրբեջանի ԱԳՆ-ն հայտարարություն էր տարածել՝իր դժգոհությունները հայտնելով սպասվելիք հանդիպման առնչությամբ։
