23.11.2024 | 00:04
Վթար Երևան քաղաքի Տիչինայի փողոցում․ կան հոսպիտալացվածներ
«Սա ստեղծում է նոր բաժանարար գծեր»․ Ադրբեջանի ԱԳՆ-ն՝ ապրիլի 5-ին սպասվող ՀՀ-ԱՄՆ-ԵՄ ձևաչափով հանդիպման մասին
Քաղաքականություն
27.03.2024 | 11:06
Պաշտոնական Բաքուն անհանգստացած է ապրիլին 5-ին Բրյուսելում կայանալիք ՀՀ-ԱՄՆ-ԵՄ եռակողմ հանդիպումից։ Ադրբեջանի ԱԳՆ խոսնակ Այխան Հաջիզադեն հայտարարություն է տարածել, որը, փաստացի, երրորդ երկրների հարաբերություններին միջամտելու դրսևորում է։
Հայտարարության մեջ ասվում է, որ ԵՄ-ի, Հայաստանի և ԱՄՆ-ի համատեղ հանդիպումը «ակնհայտորեն միակողմանի և կողմնակալ է, հիմնված է երկակի ստանդարտների վրա»։ Ըստ Բաքվի՝ «միջոցառումը լիակատար թափանցիկությամբ չի անցկացվում, այն զուրկ է տարածաշրջանային ընդգրկունությունից, հակասում է տարածաշրջանում խրախուսվող և այդքան անհրաժեշտ վստահության ձևավորման մթնոլորտից»:
«Սա ստեղծում է նոր բաժանարար գծեր և, այսպես կոչված, ազդեցության գոտիներ տարածաշրջանում, փոխանակ խրախուսելու հայկական կողմին բարեխղճորեն բանակցել։ Հաշվի առնելով Հայաստանում տիրող ռևանշիստական տրամադրությունները՝ Վաշինգտոնի և Բրյուսելի նման բաց հայանպաստ հրապարակային հայտարարությունը կարող է վտանգավոր պատրանք ստեղծել Հայաստանում, որ ԵՄ-ն և ԱՄՆ-ն պատրաստվում են աջակցել Հայաստանին Ադրբեջանի դեմ հնարավոր նոր սադրանքներում։ Այդ դեպքում ԵՄ-ն և ԱՄՆ-ն կկիսեն պատասխանատվությունը Հայաստանի ցանկացած ապակայունացնող գործողության համար», – նշել է Ադրբեջանի ԱԳՆ ներկայացուցիչը։
«Մենք ևս մեկ անգամ կոչ ենք անում բոլոր կողմերին զերծ մնալ խաղաղության ջանքերի համար հակաարդյունավետ քայլերից, որոնք կարող են տարածաշրջանում էսկալացիայի և լարվածության նոր ալիքներ հրահրել, երբ կա եզակի հնարավարություն հասնելու կայուն խաղաղության, կայունության և անվտանգության՝ հիմնված միջազգային իրավունքի հիմնարար սկզբունքների և նորմերի վրա»,-նշվում է հայտարարության մեջ։
Հիշեցնենք՝ Բրյուսելում սպասվող հանդիպմանը մասնակցելու են ՀՀ վարչապետ Նիկոլ Փաշինյանը, ԱՄՆ պետքարտուղար Էնթոնի Բլինքենն ու Եվրահանձնաժողովի նախագահ Ուրսուլա ֆոն դեր Լեյենը։
Էմմա Չոբանյան
