15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Փաշինյանը, Ֆոն դեր Լայենն ու Բլինքենը կքննարկեն Հայաստանի զարգացմանը միտված եռակողմ համագործակցության ուղիները
Քաղաքականություն
21.03.2024 | 10:55
Բրյուսելում ապրիլի 5-ին տեղի կունենա Հայաստանի վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լայենի և ԱՄՆ պետքարտուղար Էնթոնի Բլինքենի հանդիպումը, որի ժամանակ քննարկվելու է Հայաստանի զարգացմանը նպաստող եռակողմ համագործակցության ուղիները։
«Արմենպրես»-ի հետ զրույցում այս մասին հայտնել է Հայաստանի անվտանգության խորհրդի քարտուղար Արմեն Գրիգորյանը։
Հարց. Պարոն Գրիգորյան, 2023 թվականի հոկտեմբերի 5-ի Գրանադայի Փաշինյան- Ֆոն դեր Լայեն համատեղ հայտարարության մեջ նշված էր, որ նախագահ Ֆոն դեր Լայենը վարչապետ Փաշինյանին տեղեկացրել է Հայաստանին աջակցելու համար ԵՄ-ԱՄՆ համատեղ միջոցառման նախապատրաստման մասին: Արդյո՞ք կա այդ միջոցառման կազմակերպման մասով որևէ առաջընթաց:
Պատասխան. Ոչ միայն առաջընթաց կա, այլ նաև միջոցառման օրն է նշանակված: Սույն թվականի ապրիլի 5-ին Բրյուսելում նախատեսվում է անցկացնել նախագահ Ֆոն դեր Լայեն-վարչապետ Փաշինյան-պետքարտուղար Բլինքեն համատեղ հանդիպումը, որտեղ նախատեսվում է քննարկել եռակողմ համագործակցության ուղիները, որոնք նպաստելու են Հայաստանի զարգացմանը: Միջոցառումը նաև նպատակ ունի ամրապնդել Հայաստանի դիմակայունությունը: Մոտակա շրջանում միջոցառման մասին ավելի մանրամասն խոսելու հնարավորություն կլինի:
Հիշեցնենք, որ 2023-ի աշնանը հայտնի դարձավ, որ ԱՄՆ-ն և ԵՄ-ն Հայաստանի և անդրատլանտյան դաշնակիցների մերձեցման սխեմա են մշակում։ Տեղեկությունը հայտնել էր ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ’Բրայենը Կոնգրեսում Լեռնային Ղարաբաղի հարցով քննարկմանը․ «Եվրահանձնաժողովի նախագահ Ուրսուլա ֆոն դեր Լյայենը հրապարակավ հայտարարել է, որ մտադիր է հանդիպում անցկացնել մեր և Հայաստանի միջև՝ Երևանը մեր համայնքին մերձեցնելու նպատակով։ Այս մասին մի քանի օր առաջ խոսել եմ Հայաստանի վարչապետ Նիկոլ Փաշինյանի հետ: Մենք քննարկում ենք, թե դա ինչ տեսք կարող է ունենալ», – ասել էր դիվանագետը։
Ուրսուլա ֆոն դեր Լյայենը 2023-ի հոկտեմբերին խոսել էր այդ հանդիպման մասին՝ նշելով․ «Սա առաջին քայլն է՝ ամրապնդելու մեր երկկողմ հարաբերությունները Հայաստանի հետ, քանի որ Եվրոպան և Հայաստանն ունեն երկար ու հարուստ ընդհանուր պատմություն, և եկել է ժամանակը նոր գլուխ բացելու այդ ընդհանուր պատմության մեջ», – ասել էր Եվրոպական հանձնաժողովի նախագահը:
