ԵՄ առաջնորդներն առաջին անգամ Գազայում ամբողջական հրադադարի կոչ են արել

ԵՄ երկրները միաձայն հանդես են եկել Գազայում «անհապաղ մարդասիրական դադարի օգտին, որը կհանգեցնի կայուն հրադադարի»: Իսրայելի և ՀԱՄԱՍ-ի միջև պատերազմի մեկնարկից ի վեր Հունգարիան առաջին անգամ միացել է նման հայտարարությանը, գրում է Euronews-ը։

Բեկումը տեղի է ունեցել ԵՄ 27 առաջնորդների միջև հինգ ամիս տևած խորը տարաձայնություններից հետո, որը վտանգի տակ էր դնում ԵՄ միասնականությունը:

Բրյուսելում գագաթնաժողովի մասնակիցներն ափսոսանք են հայտնել Գազայում աղետալի հումանիտար իրավիճակի, դրա անհամաչափ ազդեցության մասով խաղաղ բնակչության նկատմամբ, ինչպես նաև սովի, որն առաջացել է օգնության անբավարար հոսքերի պատճառով։

Եվրոպական խորհրդի նախագահ Շառլ Միշելը, որը պատասխանատու է ԵՄ պետությունների և կառավարությունների ղեկավարների միջև փոխզիջման միջնորդության համար, բարձր է գնահատել «ուժեղ և միասնական հայտարարությունը»:

ԵՄ ղեկավարները կոչ են անում Իսրայելին չշարունակել իր ծրագրված ներխուժումը Գազայի հարավում գտնվող Ռաֆահ շրջան, որտեղ, ըստ հաշվարկների, ավելի քան մեկ միլիոն պաղեստինցիներ պատսպարվում են պատերազմից: ԵՄ-ն նաև Իսրայելից պահանջում է կատարել Արդարադատության միջազգային դատարանի վճռորոշ որոշումը, որը պարտավորեցնում է Բենիամին Նեթանյահուի կառավարությանը միջոցներ ձեռնարկել՝ Գազայում ցեղասպանությունը կանխելու համար:

Թեպետ ԵՄ որոշ երկրներ, ինչպիսիք են Բելգիան, Իսպանիան և Իռլանդիան, դեռ հոկտեմբերին էին հրադադարի կոչ անում, Չեխիան և Հունգարիան արգելափակել էին այն՝ մտավախություն հայտնելով, որ դա կխաթարի Իսրայելի ինքնապաշտպանության իրավունքը։

Փետրվարին ԵՄ բոլոր երկրների արտաքին գործերի նախարարները, բացառությամբ՝ Հունգարիայի, հավանություն էին տվել շրջափակված Գազայի հատվածում մշտական ​​հրադադար հաստատելու կոչին, սակայն Բուդապեշտն օգտագործել էր իր վետոն:

ԵՄ առաջնորդները նշում են, որ իրենք «ցնցված» և «խորապես անհանգստացած են» Գազայում տիրող հումանիտար իրավիճակով և ընդգծում են՝ կենսական օգնություն հասցնելու համար անհրաժեշտ են «լրացուցիչ ցամաքային անցումներ»:

ԵՄ աջակցությունն է ստացել Կիպրոսն ու Գազան միացնող ծովային միջանցքը, սակայն միության շատ առաջնորդներ նշում են, որ ծովային միջանցքը չի կարող փոխարինել ցամաքային մուտքին, և կոչ են անում Իսրայելի իշխանություններին՝ անել ավելին, որ օգնությունը հասնի պաղեստինցիներին։