Մոսկվայի մարզում ԱԴԾ-ն Հայաստանի երեք քաղաքացու է ձերբակալել թմրանյութերի գործով

Մոսկվայի մարզում Հայաստանի երեք քաղաքացի է ձերբակալվել թմրանյութեր արտադրելու և տարածելու գործով, լուծարվել է արգելված նյութերի արտադրության լաբորատորիա։ Այս մասին հայտնել է ՌԴ ԱԴԾ հասարակայնության հետ կապերի կենտրոնը, գրում է «Ինտերֆաքս»-ը։

«Մոսկվայի մարզի Չեխով քաղաքային շրջանում հանցավոր խմբի գործունեության կասեցման գործողություն է իրականացվել, որը բաղկացած է ՀՀ երեք քաղաքացիներից՝ մասնագիտացված հատկապես խոշոր մասշտաբով սինթետիկ թմրանյութերի արտադրության և համացանցի միջոցով դրանց ապօրինի վաճառքի մեջ»,- ասվում է հաղորդագրության մեջ։

ԱԴԾ-ն հայտնում է, որ տեղեկություն է ստացվել, որ Մոսկվայի մարզում գործում է սինթետիկ թմրամիջոցների արտադրության գաղտնի լաբորատորիա՝ մի քանի անօրինական առցանց խանութների համար։ Նշվում է, որ կազմակերպված հանցավոր խմբի անդամները բացահայտվել  են, նրանց անօրինական գործունեության համակարգային բնույթը հաստատվել է։

«Թմրամիջոցների լաբորատորիայի գտնվելու վայրից ձերբակալվել են ՀՀ երեք քաղաքացիներ, առգրավվել է առնվազն 86 կգ մեֆեդրոն թմրամիջոց, ինչպես նաև լաբորատոր սարքավորումներ և տարբեր քիմիական նյութեր»,- ասվում է հաղորդագրության մեջ։

ԱԴԾ քննչական վարչությունը քրեական գործ է հարուցել ՔՕ-ի 228.1 հոդվածի  5-րդ մասով (հատկապես խոշոր չափերով թմրամիջոցների արտադրություն)։ Հանցավոր խմբի մասնակիցների նկատմամբ որպես խափանման միջոց է ընտրվել կալանավորումը։ ՔՕ 228.1-րդ հոդվածի 5-րդ մասով նախատեսվում է պատիժ՝ ընդհուպ մինչև ցմահ ազատազրկումը։