Նայեք ի՜նչ թատրոններ են` Ազգային ժողով, Երևանի ավագանի`դրա´նք փակեք. Լևոն Հարությունյան․ՏԵՍԱՆՅՈՒԹ

«Ինչ-որ կլոր կնիք կամ թղթի կտոր չի կարող ավելացնել կամ պակասեցնել իմ հպարտությունը, այնպես որ, ուրախ եմ, որ կոչումներ չունեմ: Բայց երբ կառավարությունը իր վրայից ուզում է գցել այդ բեռը և չեղարկել պետական կոչումները, վախենում է ստատուս տալ մարդկանց, որոնք իրենցից ինչ-որ բան են ներկայացնում, պետք է դրա դիմաց նոր բան առաջարկի»,-Factor TV-ի հետ զրույցում նշում է դերասան Լևոն Հարությունյանը:
Նրա համոզմամբ`մեր պետության ամենամեծ խնդիրն այն է, որ այսօր ոչ ոք իր տեղում չէ. «Օրինակ`ո՞վ է Արդարադատության նախարարի տեղակալին իրավունք տվել Նիկոլայ Ծատուրյանի մասին ասել. «Կոչում ունի, բայց ո՞վ է նրան ճանաչում»: Այս կառավարությունը ժողովրդին քնեցրել է, ամեն օր մի ծիծաղելի փաստարկ է հնչում կառավարության շուրթերից մե´կ ասֆալտի, մե´կ «խոպանչիների» մասին. մինչև ե՞րբ»:
Լևոն Հարությունյանը նշում է, որ ներկայիս կառավարությունն իր գործելաոճով ստիպեց չհավատալ որևէ իշխանության. «Նայում եմ մեր կառավարությանը, կծկվում եմ, ասում եմ` սրա՞նք են մեզ խաբել, այս իշխանությունը զգաց աթոռի համն ու ճզմեց իմ հպարտությունը: Այսպիսի ֆինալ ես չէի պատկերացնի: Չեմ ընդունում, երբ ասում են`եթե ոչ Փաշինյանը, բա էլ ո՞վ. դա զզվելի փաստարկ է…»:
Դերասանը խոսում է նաև Ազգային ժողովի, Երևանի ավագանու մասին, տեսակետ հայտնում, որ այդ կառույցներում ոչ կոմպետենտ մարդիկ են աշխատում. «Ազգային ժողովը մեծերի մանկապարտեզ է, որտեղ դաստիարակ չկա, նայեք ի՜նչ թատրոններ են` Ազգային ժողով, Երևանի ավագանի`դրա´նք փակեք»:

Մանրամասները`տեսանյութում:

Աննա Բաբաջանյան