Այսօրվանից միայն էլեկտրոնային դեղատոմսի առկայության դեպքում պետք է վաճառվեն հակավարակային, հակաբիոտիկային, հակասնկային, հակամիկրոբակտերային, հակավիրուսային դեղորայքը, իմունային շիճուկները, իմունոգլոբիլինը, պատվաստանյութերն ու միզոպռոֆոլ պարունակող դեղամիջոցները։ Որոշումը երեկ ընդունվեց կառավարության նիստում։
Factor TV-ն այսօր շրջայց է կատարել դեղատներում և արձանագրել, որ մայրաքաղաքի դեղատներում շարունակվում է նման դեղորայքի վաճառքն առանց էլեկտրոնային դեղատոմսի։
ԱՆ դեղորայքային քաղաքականության և բժշկական տեխնոլոգիաների վարչության պետ Մարինա Հարությունյանն օրեր առաջ Factor TV-ի հետ զրույցում ներկայացրել էր, թե ինչպես է վերահսկվելու էլեկտրոնային դեղատոմսերի կիրառությունը։
«Տեսչական մարմնի միջոցով է վերահսկողությունն իրականացվելու, և ես ուզում եմ նաև տեղեկացնել, որ վարչական իրավախախտումների մասին օրենքում կա այսպիսի դրույթ․ եթե դեղատոմսով դեղը դեղատնից բաց թողնվի ոչ դեղատոմսով, արդեն նվազագույն աշխատավարձի հնգապատիկը տույժ և տուգանքի ուժով առկա է»,- ասել էր Հարությունյանը։
Արդյո՞ք Առողջապահության տեսչական մարմինը որոշման ուժի մեջ մտնելու առաջին օրը դեղատներում ստուգումներ իրականացրել է․ մեր այս հարցին ի պատասխան՝ տեսչական մարմնից հորդորեցին գրավոր հարցում ուղարկել։ Իսկ երբ նշեցինք մեր արձանագրած խախտումները, հավելեցին՝ գրավոր հարցման հետ կցել նաև մեր գնած դեղորայքների կտրոնները։
Որքանո՞վ են դեղատները պատրաստ եղել փոփոխությանը․ Առողջապահության ազգային ինստիտուտի էլեկտրոնային առողջապահության ներդրման բաժնի ղեկավար Ծաղկանուշ Սարգսյանն օրերս հայտնել էր, որ փոփոխությանը պատրաստ լինելու համար քննարկումներ և իրազեկումներ են անցկացվել դեղատնային մի շարք կազմակերպությունների հետ։
Այսպիսով՝ այսօրվանից 470 անուն դեղ պետք է դուրս գրվի միայն էլեկտրոնային դեղատոմսով, որից որից 395-ն՝ անվճար և արտոնյալ պայմաններով դեղերն են, իսկ 75-ը՝ հակավարակային, հակաբիոտիկային, հակասնկային, հակամիկրոբակտերային, հակավիրուսային դեղերի, իմունային շիճուկների, իմունոգլոբիլին և պատվաստանյութեր ու միզոպռոֆոլ դեղամիջոցները։ Ընդ որում՝ այսուհետ դեղը դուրս է գրվելու ազդող նյութի տեսակով, այլ ոչ թե բրենդային անվանմամբ: 2025-ի հունվարի 1-ից էլեկտրոնային դեղատոմսը պարտադիր կլինի արդեն 2566 անուն դեղերի համր: 804 անուն դեղ կշարունակի վաճառվել առանց դեղատոմսի։
Մանրամասները՝ տեսանյութում։
Անի Թամրազյան
