Ալիևը հայտարարել է, թե եվրոպական կառույցներն ավելի սերտ հարաբերություններ ունեն Հայաստանի և Վրաստանի հետ

Հարավային Կովկասում մենք տեսնում ենք առանձին գծեր կառուցելու փորձեր, հայտարարել է Ադրբեջանի նախագահ Իլհամ Ալիևը Գերմանիայի տնտեսության արևելյան կոմիտեի նախագահ Մայքլ Հարմսի գլխավորած պատվիրակության հետ հանդիպմանը։

Ալիևը դժգոհել է, որ եվրոպական ինստիտուտները շատ ավելի սերտ հարաբերություններ ունեն Հայաստանի և Վրաստանի հետ։

«Այս առումով Ադրբեջանում շատերը կարծում են, որ միակ ելքը մեր իսլամական կրոնն է, մի իրավիճակում, երբ եվրոպական կառույցները Հարավային Կովկասում շատ մոտ են պահում Վրաստանին և Հայաստանին, իսկ Ադրբեջանը դեմոնիզացվում է»,- ասել է նա։

Ալիևն անդրադարձել է նաև ԵԽԽՎ-ում Ադրբեջանի պատվիրակության լիազորությունները մեկ տարով կասեցնելու իրողությանը։

«Այն բանից հետո, երբ մենք վերականգնում ենք մեր տարածքային ամբողջականությունն ու ինքնիշխանությունը, Եվրոպայի խորհրդի խորհրդարանական վեհաժողովը որոշում է կայացնում զրկել ադրբեջանական պատվիրակությանը ձայնի իրավունքից։ Ցավոք, այս որոշումն ընդունվել է Գերմանիայի խորհրդարանի պատգամավորի նախաձեռնությամբ, որը կանցլեր Շոլցի գլխավորած կուսակցության անդամ է։ Գերմանիայի կանցլերը դրսևորում է անաչառություն, և նրա հայտարարություններն ու գործողություններն արտացոլում են դա։ Նրա ղեկավարած կուսակցության անդամը ցանկանում է օտարել Ադրբեջանին, որը ԵԽԽՎ երկու ոչ քրիստոնեական երկրներից մեկն է, և դա անում է ցուցադրաբար և նպատակային»,- ասել է Ալիևը։

Ադրբեջանի նախագահը հայտարարել է, թե Բաքուն որոշել է չմասնակցել կառույցի նիստերին։

«Եթե մենք իրավունք չունենք արտահայտելու մեր դիրքորոշումը, ինչո՞ւ պետք է այնտեղ լինենք»,- նշել է նա։

Ըստ նրա՝ եթե մեկ տարվա ընթացքում Ադրբեջանի պատվիրակության իրավունքները չվերականգնվեն, «կարող են լրջորեն քննարկել Եվրախորհրդից ամբողջական դուրս գալու հարցը»։

Հիշեցնենք՝ հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ էր մնացել։ Դեմ են քվեարկել Թուրքիայի պատվիրակությունից 9 պատգամավոր, ևս մեկ պատգամավոր՝ Ալբանիայից։ Բացի այդ Բաքուն նաև իր ետ սերտ կապեր ունեցող երկրների միջոցով փորձում է ճնշում գործադրել կառույցի վրա։

Մասնավորապես, Ադրբեջանի լիազորությունները վերականգնելու  հարցով ԵԽԽՎ նախագահին նամակներ են  ուղարկել կառույցում Վրաստանի պատվիրակության ղեկավարը, Հունգարիայի, Սերբիայի պատվիրակությունները, Թուրքիայի խորհրդարանի նախագահը, ինչպես նաև երկրի ԱԳՆ-ն։

Էմմա Չոբանյան