15.09.2026 | 11:24
«Դիլիջան» ազգային պարկի 1.75 հա հողատարածք վերադարձվել է պետությանը
Աշխատավարձերի ամիսներով ուշացում. «Քանաքեռ-Զեյթուն ծննդատան» ապագան անորոշ է. ՏԵՍԱՆՅՈՒԹ
Հասարակություն
27.02.2024 | 21:47
Երևանի «Քանաքեռ-Զեյթուն ծննդատան» շուրջ աղմուկը մի քանի օր է՝ չի դադարում։ Աշխատակիցներն ամիսներ շարունակ աշխատավարձ չեն ստացել։
Factor TV-ն օրերս անանուն էլեկտրոնային հաղորդագրություն էր ստացել՝ պնդումով, որ «Երևանի քաղաքապետարանի բուժվարչության պետ Դավիթ Կարապետյանը լծված է հավատարմագրային կառավարման տրված «Քանաքեռ-Զեյթուն ծննդատունը» պարալիզացնելու և հիվանդանոցին տիրանալու գործին»։ Հաղորդագրությանը կցված էր նաև ձայնագրություն, որում քաղաքապետարանի առողջապահության վարչության պետի ժամանակավոր պաշտոնակատարի և ծննդատան աշխատակիցների զրույցն է։
Քաղաքապետարանի առողջապահության վարչության պետի ժամանակավոր պաշտոնակատար Դավիթ Կարապետյանն ասում է՝ թաքցնելու ոչինչ չունի, հաստատում է՝ ձայնագրության մեջ իր զրույցն է ծննդատան աշխատակիցների հետ։
Ծննդատունը 2020 թվականին էր Երևանի ավագանու որոշմամբ հավատարմագրային կառավարման տրվել «Դե Վի Սան» ՍՊԸ-ին, որը պարտավոր էր 5 տարվա մեջ 200 մլն դրամի ներդրում կատարել բուժհաստատությունում։
Երևանի «Քանաքեռ-Զեյթուն ծննդատան» տնօրեն Մկրտիչ Մկրտչյանն ընդունում է, որ ծննդատունն առնվազն չորս ամսվա աշխատավարձի պարտքեր ունի, սակայն, ըստ տնօրենի, կառավարչի կողմից մշակված ծրագրերի իրականացմանը խոչընդոտում է հենց քաղաքապետարանը։ Մկրտչյանը պնդում է՝ ծննդատունը պարտքեր է ունեցել դեռևս քաղաքապետարանի ենթակայության տակ եղած ժամանակ։
Այսպիսով՝ քաղաքապետարանը 2022-ին միակողմանիորեն լուծել է ընկերության հետ կնքած պայմանագիրը: Ըստ Դատալեքս դատական տեղեկատվական համակարգի՝ դրանից հետո «Դե Վի Սան» ՍՊԸ-ն հայց է ներկայացրել դատարան ընդդեմ Երևան համայնքի՝ իրավունքը խախտող կամ դրա խախտման համար վտանգ ստեղծող գործողությունները կանխելու մասին պահանջով։ Այս դատական գործը դեռ շարունակվում է, հաջորդ նիստը սպասվում է այս տարվա հունիսի 16-ին։
Մանրամասները՝ տեսանյութում։
Անի Թամրազյան
