22.07.2026 | 23:29
СHP-ի նկատմամբ ճնշումների ֆոնին՝ Թուրքիայի ընդդիմության առաջնորդը հայտնել է նոր կուսակցություն ստեղծելու մասին
Բարձրաստիճան պաշտոնյաներն օրենք են խախտում. ում ծառայողական մեքենաներն են երթևեկում փարոսիկներով. ՏԵՍԱՆՅՈՒԹ
Քաղաքականություն
27.02.2024 | 21:42
Հայաստանում մի շարք բարձրաստիճան պաշտոնյաների ուղեկցող և սպասարկող ավտոմեքենաներ կահավորված են առկայծող փարոսիկներով, ինչը նախատեսված չէ օրենքով։ Ազգային ժողովի իշխանական պատգամավոր Արսեն Թորոսյանն էր վերջերս անդրադարձել խնդրին՝ հրապարակելով ցանկը․
«ՀՀ գլխավոր դատախազին սպասարկող և ուղեկցող ավտոմեքենա
ՀՀ քննչական կոմիտեի նախագահին սպասարկող և ուղեկցող ավտոմեքենա
ՀՀ ԲԴԽ նախագահին սպասարկող և ուղեկցող ավտոմեքենա
ՀՀ Կենտրոնական բանկի նախագահին սպասարկող մեքենա
ԱՄՆ դեսպանին սպասարկող մեքենա
ՌԴ դեսպանին սպասարկող մեքենա»:
Թորոսյանի հրապարակային հայտարարությունից հետո փարոսիկներն արդյո՞ք հանվել են ծառայողական մեքենաների վրայից․ Factor TV-ի հարցին ի պատասխան՝ Գլխավոր դատախազության, Կենտրոնական բանկի հասարակայնության հետ կապերի ծառայություններից հորդորեցին գրավոր դիմել, իսկ ԲԴԽ մամուլի խոսնակը մատնանշեց Կարեն Անդրեասյանի վերջին մեկնաբանությունն այդ թեմայով։ ԲԴԽ նախագահը, վերջերս անդրադառնալով իրեն սպասարկող և ուղեկցող մեքենաների վրա տեղադրված առկայծող փարոսիկներին, նշել էր, որ մեքենան այդ տեսքով է իրեն տրամադրվել։
ՔԿ մամուլի խոսնակ Գոռ Աբրահամյանն էլ ասաց՝ նախագահի երթևեկը կարգավորվում է օրենսդրությամբ, որը ենթադրում է նաև առկայծող փարոսիկներ։ Ներքին գործերի նախարար Վահե Ղազարյանը, թեև փաստեր չունի, թե որ պաշտոնյաներն են երթևեկում փարոսիկներով, սակայն պնդեց, որ նրանք իրավունք ունեն առկայծող փարոսիկներով կահավորված մեքենաներով երթևեկել, եթե կա դրա անհրաժեշտությունը։ Խոստովանեց՝ իրեն սպասարկող մեքենայի վրա էլ կան փարոսիկներ։
«Ճանապարհային երթևեկության անվտանգություն և վերահսկողություն» ՀԿ անդամ Արտակ Գաբոյանը հակադարձում է՝ առկայծող փարոսիկներով կահավորման ենթակա տրանսպորտային միջոցների ցանկը հաստատում է կառավարությունը, որում ներառված են օպերատիվ-ծառայողական աշխատանքներ իրականացնող ստորաբաժանումների տրանսպորտային միջոցները և գունագրաֆիկ երանգավորում ունեցող մեքենաները։ Թեև ցանկում ընդգրկված է Քննչական կոմիտեն, սակայն ՔԿ նախագահի ծառայողական մենքենան գունագրաֆիկ երանգավորում չունի։ Հիշատակված մյուս կառույցների ծառայողական մեքենաներն առհասարակ ցանկում ներառված չեն։
Ընդ որում՝ ցանկում նաև ավելացել է կետ, որի համաձայն՝ Պետական պահպանության ծառայության, Անվտանգության խորհրդի անդամների, վարչապետի աշխատակազմի ղեկավարի տրանսպորտային միջոցները ևս կարող են կահավորվել կապույտ կամ կապույտ և կարմիր առկայծող փարոսիկներով։
«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն էլ ընդգծում է՝ ոստիկանությունն աչք է փակում նման երևույթների վրա։
ԱԺ պատգամավոր Արսեն Թորոսյանը, որն այս թեմայով հարցումներ է ուղարկել ՆԳՆ, նշում է, որ դրանք մնացել են անպատասխան։ Իշխանական պատգամավորը հատկապես խնդրահարույց է համարում այն, որ դիվանագետներն են օրենք խախտում հյուրընկալ երկրում, տվյալ դեպքում՝ Հայաստանում։
«Հիմա ես հրապարակային ասում եմ՝ եթե այս հարցը չլուծվի, ես մի շաբաթից իմ ավտոյի վրա միգալկա եմ դնելու, ու թող փորձվեն ինձ կանգնեցնեն»,- ասել էր Թորոսյանը։
ՔՊ-ական պատգամավորի հրապարակային այս հայտարարությունից ոչ թե մեկ շաբաթ, այլ երկու ամիս է անցել։ Թորոսյանը տեղադրե՞լ է փարոսիկներ իր մեքենայի վրա՝ հրաժարվում է պատասխանել։
Մանրամասները՝ տեսանյութում։
Արփի Հակոբյան
